Në kuadër të rritjes së numrit të testimeve në Shqipërisë për koronavirusin, qeveria amerikane ka bërë një tjetër donacion.
Ambasada amerikane thotë se që prej fillimit të pandemisë janë dhuruar në total 32,160 teste, ndërkohë që gjithashtu është dhuruar një një makinë të automatizuar nxjerrëse e cila pastron ARN-në duke mundësuar stafin e ISHP-së të përpunojë më shumë teste dhe më shpejt.
“Për të ndihmuar Shqipërinë të kryejë më shumë teste për COVID-19, këtë javë USAID/Albania dhuroi komplete të tjera testimi në Institutin e Shëndetit Publik dhe Spitalin Nënë Tereza, duke sjellë numrin e përgjithshëm të testeve të dhuruara nga Shtetet e Bashkuara për popullin shqiptar në 32,160. USAID dhuroi gjithashtu një makinë të automatizuar nxjerrëse e cila pastron ARN-në duke mundësuar stafin e ISHP-së të përpunojë më shumë teste dhe më shpejt. Jemi krenarë që ofrojmë këtë mbështetje ndërkohë që bashkësia botërore vazhdon të luftojë këtë sëmundje”, njofton ambasada amerikane.
Ky veprim vjen në një kohë që qeveria shqiptare ka deklaruar mungesë kapacitetesh për një testim më masiv, dhe po i drejton shqiptarët drejt laboratorëve privatë për tamponin (95 euro) që u duhet për të kaluar kufirin me shtetet fqinje, apo për analizat serologjike (40 mijë lekë të vjetër) që u duhen për të parë nëse e kanë kaluar apo jo virusin.
Ndërkohë që privati i ka këto kapacitete për të kryer analizat, përse shteti shqiptar refuzon që të blejë po të njëjtën pajisje e ta vërë në dispozicion të ISHP-së?
Pak kohë më parë, iconstyle.al vuri në dukje se edhe pse në periudhë pandemie, janë lënë tërësisht në hije laboratorët që janë pjesë e koncesionit të check-up-it, koncesion 10-vjeçar me një vlerë prej 120 milionë eurosh që e paguajnë pikërisht taksapaguesit shqiptarë.
Kështu shqiptarët do të detyrohen të paguajnë dyfish, nëse duan të bëjnë këto analiza serologjike, njëherë privatit dhe njëherë për koncensionin që e paguajmë pikërisht me taksat tona.
Kontrata e koncesionit të check-up-it, parashikon një numër prej 475 mijë kontrollesh bazë në vit, të cilat asnjë vit nuk janë kryer të plota, e megjithatë paguhen nga shteti shqiptar si të ishin kryer të gjitha (lexo këtu).
Vetëm për këto kontrolle të pakryera, taksapaguesit shqiptarë i kanë paguar kompanisë “3P Life Logistic” të Vilma Nushit plot 6.5 milionë euro në harkun kohor të 4 viteve, sipas një raporti të KLSH-së, pagesë që është marrë për shërbime të pakryera, vetëm sepse kontrata e koncesionarit është përpiluar në mënyrë të tillë për të mbrojtur subjektin privat.
Tani që jemi në kulmin e pandemisë, shërbimet e këtyre laboratorëve mund të përshtateshin fare mirë për t’i shërbyer qytetarëve në luftën kundër COVID-19 për një testim më masiv, por jo, edhe këtë herë barra do të bjerë mbi supet e shqiptarëve!
/Iconstyle.al
