Një gjykatës spanjoll ka urdhëruar yllin e popit Shakira që të dalë në gjyq për çështjen e mashtrimit tatimor, konkretisht për mos-pagesën e taksave prej 13.9 milionë dollarësh mbi të ardhurat që ajo ka fituar midis 2012 dhe 2014.
Prokurorët do të kërkojnë një dënim me tetë vjet burg dhe një gjobë të ashpër nëse arrijnë të fitojnë një dënim të këngëtares së “Hips Don’t Lie”, e cila ka mohuar çdo akuzë.
Këngëtarja 45-vjeçare ka këmbëngulur se ajo ka jetuar vetëm më pak se gjysmën e kohës në Spanjë gjatë periudhës dyvjeçare. Ajo ka refuzuar një marrëveshje për pranimin e fajësisë me prokurorët që do ta kursente atë nga një gjyq.
Firma e saj e marrëdhënieve me publikun ka thënë se ajo ka paguar tashmë gjithçka që i detyrohej dhe 3 milionë euro shtesë – ose 2.8 milionë dollarë – në interes. Gjykata me seli në qytetin Esplugues de Llobregat pranë Barcelonës tha se Shakira do të përballet me gjashtë akuza për mashtrim tatimor.
Data e gjykimit ende nuk është caktuar.
Çështja varet nga vendi ku Shakira ka jetuar gjatë 2012-14. Prokurorët në Barcelonë kanë pretenduar se fituesja e Grammy-t kaloi më shumë se gjysmën e asaj periudhe në Spanjë dhe duhej të kishte paguar taksat në vend, edhe pse rezidenca e saj zyrtare ishte në Bahamas.
Shakira, emri i plotë i së cilës është Shakira Isabel Mebarak Ripoll, ka qenë e lidhur me Spanjën që kur filloi të takohej me futbollistin Gerard Piqué.
Pique, i cili luan për Barcelonën në La Liga, aktualisht është në lidhje me një studente 23-vjeçare, Clara Chia Marti.
Çifti, i cili ka dy fëmijë, jetonte së bashku në Barcelonë, por së fundmi i dhanë fund lidhjes së tyre 11-vjeçare. Spanja ka goditur edhe yjet të tjerë si Lionel Messi dhe Cristiano Ronaldo gjatë dekadës së fundit për mospagimin e plotë të taksave. Ata u shpallën fajtorë për evazion, por të dy shmangën burgun falë një dispozite që lejon një gjykatës të heqë dënimet nën dy vjet për shkelësit për herë të parë.
