Shakira filloi turneun e saj botëror “Las Mujeres Ya No Lloran” në Brazil. Kjo është ndalesa e parë e 30 e më shumë koncerteve që këngëtarja kolumbiane do të realizojë në Argjentinë, Kili, Kolumbi, Meksikë, Peru, Amerikën e Veriut dhe Kanada.
Para performancës së saj në stadiumin Nilton Santos të Rio de Zhaneiros, Shakira ndau një postim të gjatë në llogarinë e saj personale në rrjetet sociale, duke thënë se ajo filloi provat “një vit më parë”, duke punuar “14 orë në ditë” me qëllimin për ta bërë shfaqjen më të mirë të jetës së saj.
Shihni postimin e saj:
Siç ka shkruar me detaje këngëtarja në postimin e saj: “Sot është dita”. Aktualisht po shkruaj këto rreshta nga dhoma ime e zhveshjes. Reflektimi në pasqyrë më jep imazhin e një gruaje që ka dhënë frymën e saj të fundit në çdo provë, në çdo akord, në çdo hap.”
“E di që përsosmëria nuk ekziston, por e di që sonte do t’ju jap veten time të vërtetë me zërin tim të mprehur nga përvoja dhe trupin tim të plagosur nga çdo betejë që kam fituar dhe humbur”, ka shtuar ndër të tjera Shakira.
Turneu “Las Mujeres Ya No Lloran”, i organizuar nga Live Nation, po zhvillohet me rastin e publikimit të albumit me të njëjtin emër, i cili pak ditë më parë i dha Shakirës një çmim Grammy.
Zgjedhja e Brazilit për nisjen e turneut botëror nuk është aspak e rastësishme, pasi këngëtarja ka shprehur dashurinë e saj të veçantë për vendin, i cili e përqafoi muzikën e saj që në hapat e parë, kur ishte vetëm 18 vjeç.
