Këtë mesjavë, skuadra e Ronald Koeman do të udhëtojë për ndeshjen e dytë të raundit të 1/8-ave të Champions League. Ato duhet me patjetër që të përmbysin humbjen 4-1 që kanë pësuar në ndeshjen e parë në “Camp Nou”.
Mirëpo tifozët e Paris Saint-Germain duket se nuk po e presin mirë ardhjen e skuadrës së Barcelonës. Ato po krijojnë një atmosferë armiqësore në kryeqyetin francez.
Gjatë fundjavës ato zbuluan banderola fyese për Barcelonën dhe ndezën flakadanë. Ultrasit e PSG nuk kursyen armiqësinë e tyre as me partneren e Gerard Pique, këngëtaren e famshme, Shakirën.
Pique po lufton ende me një dëmtim në gju dhe nuk do të marrë pjesë në ndeshjen e së mërkurës në Ligën e Kampionëve.
“Shakira në La Jonquera”, lexohej në një banderolë të ndriçuar me flakadanë. Me këtë ata ju referoheshin shtëpive publike të famshme pranë qytetit të Girona, që shpesh frekuentohen nga francezët përtej kufirit.
Në një tjetër banderolë shkruhej “Barcelona nuk është e mirëpritur”.
Kjo nuk përbën çudi pasi nuk është hera e parë që këngëtarja bukuroshe sulmohet nga tifozët kundërshtarë të ekipit të ‘Barcelonës’. Po ashtu, fansat e Espanyol gjatë ndeshjeve me Barcelonën këndojnë këngë të ndyra për të.
Së fundmi fansat dolën në mbrojtje të Shakirës dhe në internet u bë mjaft viral hashtagu # RespectShakira.
