Fëmijët janë ata që gjallërojnë çdo ditë, por magjia e festave të fundvitit merr një kuptim tjetër me ta. Një event risi i organizuar me veshje të ideuar nga fotografja Anjeza Dyrmishi kishte në qendër të vëmendjes fëmijët, të cilët përjetuan ndjenjën e një sfilate të vërtetë.
Eventi “Ajna Fashion Kids” i organizuar me ta në mendje, solli veshjet më mahnitëse për fëmijë me dizajnët e personalizuara apo personazhet më të dashur vizatimorë.
Një intervistë zhvilluar më herët për “Iconstyle”, Anjeza tregoi edhe burimin e frymëzimit të saj: “Mua më lindi si ide tani që jam bërë edhe vet mami, unë kam një vajze që për pak bën 3 vjeç, quhet Ajna dhe për këtë arsye edhe i ashtuquajturi biznesi im ka marrë këtë emër. Gjithmonë ka qenë shumë e vështirë për të gjetur fustane të veçanta sidomos në tregun shqiptar, kështu që më erdhi si ide të krijoj një “mini shop” për t’i ardhur në ndihmë mamave në pozicionin tim. Fustanet janë të personalizuara dhe të dizajnuara nga vetë unë, ku çdo fëmijë mund të gjej veten të rrethuar nga personazhet e Disney-t dhe nga subjekte fëmijërore”.
Organizimi kishte si qëllim që të rriturit të hynin më shumë në botën e të vegjëlve, teksa këta të fundit pushtuan ambientin me gëzimin e tyre. Rreth 200 të ftuar shijuan nga afër magjinë e atmosferës, ku ndër nënat e famshme u dallua Sonila, Meço, Ilva Tare, Eneda Tarifa, Orgesa Zaimi dhe Marcela Lati. Por eventi mirëpriti edhe ato që ende nuk kanë përjetuar ndjesinë e mëmësisë, por ushqejnë një dashuri të pazakontë për fëmijët.
Burimi: Iconstyle
