Së fundmi, Rita Ora është zhvendosur në Australi për shkak të punës së saj. Së bashku me disa emra të njohur të muzikës si Keith Urban, Jessica Mauboy dhe Guy Sebastian, Rita do të jetë pjesë e jurisë së spektaklit “The Voice”. 30-vjeçarja e cila udhëtoi nga Londra për në destinacionin aktual, çka solli një karantinim 14-ditor, duket se më fund është e lirë të shijojë brigjet e çmueshme.
Paparacët e kanë fotografuar sërish yllin e muzikës, teksa shfaqet me një palë bikini rozë, saktësisht një trupore. Fotografitë në fjalë janë shkrepur në të njëjtin vend ku më herët, Rita u pa nën shoqërinë e së motrës, Elenës dhe një djali, i cili nuk dihet se kush është. Rita dukej mjaft e qeshur dhe e lumtur, pavarësisht se ka patur një periudhë paksa të vështirë kohët e fundit.
Në korrik u zbulua lidhja e re e Rita Orës dhe regjisorit me origjinë greko-franceze, Romain Gavras. Dyshja kaloi pushimet së bashku, mirëpo ata janë kujdesur që të mos shfaqen shumë të afërt me njëri-tjetrin në publik. Para disa muajsh u raportua se gjërat mes tyre ishin bërë familjare, sepse Rita dhe Romain u panë në një kafe me motrën e këngëtares, Elena Ora.
Por duket se gjërat mes çiftit nuk po shkonin ashtu siç ishte parashikuar. Daily Mail raportoi se Rita dhe Romain po kalonin një krizë në çift dhe shkak ishte bërë pandemia dhe thyerja e rregullave nga ana e këngëtares.
