Teksa po digjen mijëra hektarë tokë e terren pyjor në pjesën më të madhe të qyteteve të vendit, kryebashkiakët e zonave bëjnë gati telefonat dhe 2-3 ose më shumë fotografë nga mbrapa që të filmojnë zjarrfikësit apo aeroplanët teksa bëjnë punën.
E megjithëse ata financohen nga taksat e qytetarëve, vartësit e qeverisë e servirin zotësinë e tyre si të jenë duke bërë ndonjë mrekulli, ndërkohë që fermerët dhe vendasit jo vetëm që humbën prodhimet bujqësore, po u është rrezikuar jeta nga “pushteti” i flakëve që kërcënojnë dhe banesat.
Megjithatë Qeveria ka menduar për to edhe këtë herë nuk u shteruan idetë sesi t’u vijnë në ndihmë, sigurisht me taksat e tyre. Pas satelitëve 1 dhe 2, shpikja e radhës janë dronët UAV që ministri i ri i Mbrojtjes Pirro Vengu i është futur vetë kësaj pune dhe po i provon një e nga një.
Këta dronë do kapin nga cepi në cep çdo terren që digjet, sikur të ishte kaq e vështirë që të evidentohen rastet e zjarreve në zona, kur janë vetë qytetarët që denoncojnë se askush nuk u vjen në ndihmë teksa flakët kërcënojnë banesat dhe duhet të përballen vetë me to.
Pothuajse çdo vit situata e zjarreve ka qenë po e njëjta. Megjithatë për sa kohë janë satelitët dhe dronët qeveritarët e kanë kryer punën me sukses. E kemi parë rezultatin e satelitëve të kryeministrit Rama që fliste i ngazëllyer për shpikjen e tyre si të ishin kometa a meteorë. I kanë kapur cep më cep tokat me hashash, çdo centimetër të ndërtimeve pa leje, çdo shtesë në qytet, në bregdet, në mal.
Policët i kanë patur në pëllëmbë të dorës shkeljet në terren, për ndërtimet pa leje apo edhe ndotjen e mjedisit, falë satelitëve.
“Gjithçka do të kaloj te një sy tjetër që është lart, që nuk ka kushërinj, miq, parti, asnjë lidhje emocionale por vetëm mbledhje dhe kalim të dhënash në duart e autoriteteve”, i përshkruante Rama këta satelitë.
Tani me dronët “Bayraktar” do kapen edhe zjarret. /Gazeta Reforma
