Trupi i gjigantit surrealist, Salvador Dalí, do të zhvarroset pasi një fallxhore spanjolle pretendon se është e bija e tij. Ajo fitoi të drejtën për të bërë këtë veprim, ndërsa historia nisi në në 2015-n, kur Pilar Abel, lexuese letrash dhe astrologe nga Gerona në Spanjë paraqiti një padi në Madrid, ku thoshte se ishte vajza e artistit.
Ajo paditi shtetin spanjoll, ku Dalí la pasurinë e tij dhe fondacionin e artistit. Nëse diçka e tillë është e vërtetë, Abel mund të përfitojë 25% të pasurisë së tij, që ndryshe përkthehet në 336 milionë dollarë.
Vendimi i 20 qershorit nga gjykata e Madridit, hap rrugën për zhvarrosjen e eshtrave të Dalí-t në Figueres të Spanjës, për të kryer të gjitha analizat e nevojshme të ADN-së që do vërtetojnë pretendimet e Abel. Zhvarrimi mund të ndodhë që muajin e ardhshëm, sipas BBC.
Fondacioni i artistit ka në plan të apelojë vendimin. Abel ka kryer teste të ADN-së një dekadë më parë duke përdorur flokët dhe lëkurën nga maska e vdekjes së artistit, por rezultatet nuk ishin bindëse.
Ajo pretendon se është produkt i një lidhjeje të fshehtë, gjatë kohës që mamaja e saj punonte tek një familje në Cadaqués, ku edhe Dalí kishte një shtëpi. Sipas Abelit, të dy u takuan dhe kishin një lidhje.
Në atë kohë Dalí ishte i martuar me muzën e tij, Gala, me të cilën nuk kishte fëmijë. Lidhja e fshehtë e të dyve nisi në vitin 1955. Ajo lindi në vitin 1956. Abeli thotë se nëna e saj e ka thënë në vazhdimisht, madje edhe në prezencë të njerëzve të tjerë, se artisti ishte babai i saj.
Pionieri i lëvizjes surrealiste vdiq në 1989-n në moshën 85-vjeçare.
Burimi: BBC
