Enea është 18 vjeç, por asnjëherë nuk i është trembur punës. Që në moshën 14 vjeçare, çdo ditë në orën 8:00 të mëngjesit, ai zë një cep të trotuarit përpara Prokurosisë së Përgjithshme në Tiranë, për të mbledhur paratë që i duhen për të blerë librat dhe gjithçka tjetër për vitin shkollor. Përtej nevojave të përditshme, Enea vuan nga talasemia që në lindje dhe i duhen 15 mijë lekë të vjetra në muaj për ilaçe.
“Kam filluar të punoj me peshoren në moshën 14-vjeçare. Kisha peshoren e babit në shtëpi dhe nisa punën. Mbledh para’ për librat që më kushtojnë 50 mijë lekë (të vjetra)”, shprehet 18-vjeçari.
Djaloshi rrëfen se në familjen e tij, punon vetëm i ati.
“Vetëm babai punon dhe merr 150 mijë lekë të vjetra. Na dalin vetëm për ujë dhe drita”, tregon Enea.
Enea nis këtë sezon shkollor, vitin e tretë në Shkollën Profesionale Elektrike. Banorët e lagjes tregojnë shumë respekt për adoleshentin që ka gjetur këtë mënyrë për të siguruar lekët e librave.
Burimi: Top Channel
