Autoriteti i vëzhgimit dhe kontrollimit të reklamave në Francë (ARPP) i tërhoqi vëmendjen “Saint Laurent”. Agjencia i kërkoi shtëpisë së modës, që të modifikonte dy reklamat nga fushata e “Pranverë 2017”, duke i cilësuar “poshtëruese” për femrat.
Në dy fotot në fjalë shfaqet një femër, te njëra qëndron e ulur me këmbë të hapura, ku mban veshur patina dhe geta rrjete, ndërsa te tjera shfaqet duke mbështetur kokën te një stol.
Shtëpia franceze e modës mori shumë ankesa në mediat sociale dhe 50 ankesa formale nga “ARPP”, sipas “Reuters”.
Drejtori i “ARPP”, Stephane Martin, tha se marka ka shkelur të drejtat e shtetit lidhur me reklamimin, për të ruajtur “dinjitetin dhe respektin në përfaqësimin e personit”.
Takimi mes “Saint Laurent” dhe “ARPP” është planifikuar të premten, ku komisioni do t’i kërkojë të ndryshojë ose ta tërheqë reklamën.
“Nuk jam i sigurt nëse klientet femra do ta lidhnin veten me këto imazhe. Ne patëm një lloj të tillë reklamimi porno “chic” një dekadë më parë dhe tani sërish, gjë që nuk është e tolerueshme”, tha Martin për “The Guardian”.
Marka e modës ende nuk ka reaguar për rastin në fjalë.
Burimi: Elle
