Bëri goxha bujë puthja e parë në “Love story”, javën e kaluar mes Saimirit dhe Silvanës.
Ata patën një takim romantik në vilën e beqarit dhe kanë folur pak për udhëtimet, që u pëlqejnë të dyve, por shumicën e kohës dyshja e ka kaluar mes përqafimeve, çokollatave, verës dhe puthjeve, duke u munduar edhe t’u shmangen kamerave të produksionit.
Pas kësaj i menjëhershëm ka qenë reagimi i Albanës, motrës binjake të Silvanës, e cila ka vendosur të largohet nga emisioni. Në fakt, Albana dhe Silvana kishin deklaruar që prej fillimit që kur njëra prej tyre të kishte më shumë afrimitet me Saimirin, tjetra do të tërhiqej. Pasi pa klipin e takimit të së motrës, Albana shprehu fjalët më të mira për të dy dhe vendosi të largohet nga programi.
Ndërkohë, Saimiri pati mbrëmjen e kësaj të hëne takimin e dytë me Suelën dhe të dy u përfshinë në disa skena shumë pasionante. Ata të dy shkëmbyen puthjen e parë në buzë me njëri-tjetrin dhe sigurisht që kjo ndezi debat në studio. I pari që i doli kundër Saimirit kundër për këtë veprim ishte opinionisti, Robert Aliaj. Ai u shpreh se një burrë modern që puth një vajzë ka një përkushtim jetësor dhe nuk mund t’i marrë të gjitha me radhë.
Ndërsa Saimiri u shpreh se puthja për të është një etapë e dashurisë dhe me të kupton nëse ka ndjenja për një vajzë apo jo. Gjithashtu këtë puthje nuk e priti mirë as Silvana, vajzës së cilës Saimiri i rrëmbeu puthjen e parë në spektakël.
Ajo iu kthye kundër “princit modern” dhe u shpreh se u zhgënjye shumë nga ky veprim i tij, sepse nuk e priste që të puthte kaq herët një vajzë tjetër. Gjithashtu Silvana paralajmëroi se do të ndërmarrë një hap tjetër, nëse ai vazhdon të bëjë të njëjtën gjë. Për “Daily love story” u shpreh se nuk do e puthë më.
“Kisha shumë gjëra për të thënë por pak a shumë u shpreha. Nuk më pëlqeu fare si e argumentoi puthjen por shpresoj ta rregullojë situatën. Gabimi ishte te fakti që e konsideron puthjen si sipërfaqësore, që nuk i jep vlerë. Unë i dhashë shumë vlerë, kurse ai e konsideroi si një stacion. Nuk më pëqeu fare”.
