Ekzekutimi i Aleksandër Sadikajt më 11 Qershor 2022 po krijon një zinxhir atentatesh, ku në shënjestër duket se janë vënë të afërmit e tij.
Pak ditë pasi, motra e viktimës mori rolin e ‘hetuesit’ duke publikuar disa emra që pretendoi se ishin autorët, për të cilët policia nuk ka gjetur ende asnjë gjurmë, në Greqi është tentuar të vritet kushëriri i Sadikajt.
Bëhet fjalë për 51 vjeçarin Andrea Kalemi alias Adriatik Kalemi nga Memaliaj, i cili është plagosur me thikë në krahë, kraharor dhe qafë në burgun e sigurisë së lartë “Koridhalos” në Athinë.
Autori egjiptian ishte transferuar nga burgu i Domokos në burgun e Koridhalos, ndërsa në telefonin e tij ai kishte foton e Andrea Kalemit, për të cilin dyshohet se ishte paguar ta vriste.
Ngjarja është shënuar vetëm pak ditë para se Kalemi të lirohej nga burgu dhe dyshohet se autori ka pritur pikërisht këtë çast për ta eliminuar.
Megjithatë burime jo zyrtare konfirmojnë se pas daljes nga spitali, Kalemi është shoqëruar për në kufirin greko-shqiptar nga policia pasi e ka përfunduar dënimin dhe për këtë arsye është riatdhesuar.
Andrea Kalemi alias Adriatik Kalemi, është djali i dajës së Aleksandër Sadikajt nga Memaliaj, i ekzekutuar në një atentat me eksploziv në Sauk të Tiranës në qershor 2022. Në 16 dhjetor 2022 në Tiranë u ekzekutua biznesmeni nga Fieri me banim në Sarandë, Edmond Papa.
Për vrasjen e tij është arrestuar shoku i Andrea Kalemit, Albano Velo, 30 vjeç ndërsa në kërkim është shoku tjetër i tij, Andrew Bode, 44 vjeç, i cili është edhe personi që ekzekutoi Papën. Në dosjen e ngjarjes përmendet edhe emri i Andrea Kalemit.
Saga e hakmarrjes ka nisur pas dyshimeve të familjes së Aleksandër Sadikajt se pas vrasjes së këtij të fundit, qëndron Edmond Papa.
