Psikologia e Shtëpisë së Fëmijës në Shkodër, nga ku u bë publik rasti i abuzimit të vajzës jetime nga roja dhe një mësues, është e palicencuar.
“Xing.al” shkruante dje për mënyrën e trajtimit të rastit të Adrianës, 27 vjeçe, e cila tronditi opinionin publik me ngjarjet tronditëse të përdhunimit që sipas dëshmisë, i kanë ndodhur brenda institucionit, ku Antonjeta Pero, e vetëdeklaruar si psikologe punon.
Por për këtë të fundit, Urdhri i Psikologut bën me dije se “nuk ka qenë apo është antare e Urdhrit të Psikologut dhe as psikologe e licencuar”.
Sipas të dhënave që ka në Facebook, Pero ka shërbyes si ish-drejtoreshë ekzekutive në një organizatë joqeveritare, ka studiuar në “universitetin e mësuesisë” dhe ka studiuar për “psikologji dhe punë sociale”. Por a mund të ushtrojë profesionin në këto kushte? Për këtë, Dr.Valbona Treska, presidente e Urdhrit të Psikologut shpjegoi për Anabel.al se “ka rëndësi faza e licensimit”.
“Nëse një psikolog është në fazat e fundit të procesit të licencimit mund të bëjë kërkesë që të ushtrojë profesionin, por gjithmonë nën mbikqyerjen e një psikologu të licencuar”.
Por duke qenë se Antonjeta Pero nuk është anëtare e Urdhrit të Psikologut dhe nuk rezulton as në regjistrin e anëtarësimeve, kjo i heq kategorikisht të drejtën të ushtrojë profesionin.
Pyetja që lind është sa profesionalisht dhe seriozisht po trajtohen këto raste të abuzimit social?
Shtëpia e Fëmijës si një institucion shtetëror që u vendos nën akuza të rënda, nuk ka reaguar për rastin në fjalë, ndërsa Pero thotë se nuk është në dijeni për cilin roje e ka fjalën Adriana. Ajo ka vite që ushtron profesionin e psikologes pa licencë dhe rrjedhimisht lind dyshimi edhe për profesionalizmin e saj për të trajtuar raste të tilla të ndjeshme për fëmijët jetimë që duhet të kenë vëmendje maksimale.
Në një intervistë për emisionin e mëngjesit “Kafe Shqeto”, ajo madje është shprehur se pas Adrianës fshihen persona të tjerë që kanë përfitime mediatike/politike ndaj Shtëpisë së Fëmijës dhe po e përdorin 27-vjeçaren.
Pikërisht për shkak të mungesës së provave të mjaftueshme për abuzimin, është lënë i lirë edhe shefi i policisë së Fushë Arrëzit, i cili u akuzua se abuzoi me Adrianën kur kjo e fundit shkoi të denonconte përdhunimin. Arrestimi u bë pas kallëzimit të vajzës, ne prani te nje psikologu, por sipas prokurorisë, nuk ka prova të mjaftueshme që e shpallin fajtor Izmir Durakun.
Njoftimi i plotë i urdhrit të psikologut:
SQARIM PËR KOMUNITETIN E PSIKOLOGEVE DHE OPINIONIN E GJËRË TË QARKUT SHKODËR DHE JO VETEM,
Duke marrë shkas nga qëndrimi personal publik i Znj. Antonjeta Pero, me statuse në rrjete sociale apo në media të ndryshme, ju bëjme me dije se Znj.Pero nuk ka qene apo është antare e Urdhrit të Psikologut dhe as psikologe e licensuar, konforme ligjit 40/2016, neni 7.
Rregjistri i antarësisë, mund të konsultohet online në: http://regjistri.urdhriipsikologut.al/members/list/anetare
Sa më poshtë, respektojmë çdo mendim, opinion, qëndrim të çdo shtetasi të Republikes, por në asnjë kohe, duke mbartur mbi vete titull i cili më parë jepet nga Urdhri si organ i ngarkuar me ligj.
Altin Nika
Zyra e koordinatorit lokal,Qarku Shkoder
