“Dy Gisht Mjaltë” me protagoniste Elvana Gjatën dhe Ermal Mamaqin, e nisi me një premierë në Tiranë, për të vijuar më pas në Prishtinë e tani, po bën xhiron në kinematë e shumë shteteve evropiane.
Në premierën e parë në kryeqytetin shqiptar, Elvana u duk se kishte vendosur ta zbuste tonin e veshjeve që jemi mësuar të shikojmë zakonisht nëpër tapete të kuq.
Ajo u shfaq me një fustan në ngjyrë të gjelbër neoni, në të cilin e gjithë pesha i mbetej frudës së madhe asimetrike tek pjesa e bustit.
Tek veshja e premierës në Prishtinë, Elvana vendosi ta çonte më tej lojën e frudave, duke zgjedhur të vishte pantallona të zeza, për t’ia lënë gjithë vëmendjen bustit super voluminoz ngjyrë vishnje.
Sot, kasti i “Dy Gisht Mjaltë” prezantoi filmin në Zyrih të Zvicrës. Dhe sa më larg shkon filmi, aq më gjigande janë frudat: detaji që nuk mungon në asnjërën prej veshjeve të Elvanës në premierat e filmit.
Këtë herë me një fustan të tyltë në ngjyrë të kuqe të ndezur, ajo riktheu në mënyrën më ekstravagante të mundshme glamour-in e veshjeve festive të viteve ’80.
Nesër, “Dy Gisht Mjaltë” pritet të ketë premierën edhe në Luzernë, ndërsa shumë shpejt do të shfaqet edhe në kinematë e Gjermanisë, Austrisë, Suedisë, Hollandës, Greqisë dhe Malit të Zi.
