Për herë të parë Zgjedhjet e 25 prillit 2021 pritet të votojnë emigrantët. Për të marrë vesh se sa pjesëtarë të diasporës pritet të votojnë, Komisioni Qendror i Zgjedhjeve i ka dërguar një letër Drejtorisë së Përgjithshme të Gjendjes Civile.
Përmes saj, KQZ i kërkon numër të saktë të shtetasve shqiptarë që jetojnë jashtë vendit. Ky institucion kërkon numrin e saktë të emigrantëve shqiptarë, të ndarë sipas qarqeve që kanë, kërkohet që institucionit të KQZ t’i dërgohet numri i regjistruar në adresën e banimit të përhershëm në vendet ku tashmë jetojnë.
Letra zyrtare mban datën 23 dhjetor dhe është firmosur nga Komisioneri Shtetëror i Zgjedhjeve, Ilirjan Celibashi.
INSTAT: 1.68 milionë shqiptarë jetojnë jashtë shtetit
Në vitin 2020, sipas vlerësimeve të tërthorta të INSTAT, numri i diasporës së re llogaritet të jetë rreth 1,68 milionë shtetas jashtë vendit ose rreth 37 % të shtetasve shqiptarë gjithsej.
INSTAT nxjerr problemet që hasen gjatë këtij regjistrimi. Nëpërmjet Regjistrit të Drejtorisë së Përgjithshme të Gjendjes Civile nuk janë të përfshirë shqiptarët të cilët për arsye të fitimit të një shtetësie të një vendi tjetër kanë hequr dorë nga shtetësia shqiptare. Ka disa vende të cilat nuk e lejojnë dy-shtetësinë dhe për këtë arsye shtetasit shqiptarë janë të detyruar të heqin dorë nga shtetësia shqiptare, në këtë mënyrë këta individë çregjistrohen nga regjistri i shtetasve shqiptarë.
Ndërkaq, lindjet të cilat ndodhin jashtë vendit dhe janë të regjistruara në regjistrin e gjendjes civile janë të përfshira në përllogaritjet e kryera nga INSTAT, por lindjet të cilat nuk regjistrohen në zyrat e gjendjes civile nuk janë pjesë e përllogaritjeve.
Komunitetet e hershme shqiptare në botë, të cilët kanë lindur jashtë kufijve të Shqipërisë, mbajnë lidhje gjuhësore, kulturore e të traditës në vazhdimësi dhe që kanë dëshirë të ruajnë lidhjet me Shqipërinë, nuk janë pjesë e përllogaritjeve të INSTAT
Sa shqiptarë e lanë shtetësinë?
Duhet të theksohet se shtetësia është një karakteristikë e ndryshueshme – njerëzit mund të fitojnë shtetësinë e vendit të huaj të qëndrimit të tyre.
Gjatë vitit 2018, 24.2 mijë shqiptarë kanë fituar shtetësinë greke; në Itali 21.8 mijë shqiptarë kanë fituar shtetësinë italiane. Së bashku me një numër të panjohur të shqiptarëve të paregjistruar, popullsia e shqiptarëve jashtë vendit do të ishte më e madhe.
Nga ana tjetër, popullsia me shtetësi shqiptare jashtë vendit përfshin një brez të dytë të fëmijëve të lindur jashtë Shqipërisë, të cilët nuk duhet të konsiderohen emigrantë.
Sa familje ikën jashtë në dekadën e fundit?
Anketa e Migracionit në Shqipëri 2019, ishte një anketë pranë familjeve, e dedikuar për mbledhjen e të dhënave për migracionin.Rezultatet e studimit janë përqendruar në karakteristikat kryesore demografike të Njësive Ekonomike Familjare (NJEF) dhe popullsisë, që kanë ndryshuar vendbanimin e tyre në krahasim me vendbanimin që kishin në vitin 2011 (Censi i fundit i Popullsisë dhe Banesave në Shqipëri, 2011).
Pas mbledhjes së të dhënave u arrit të mblidhet informacion i suksesshëm për rreth 20 mijë familje dhe rreth 72 mijë individë. Anketa e migracioni siguron një informacion, si në rang familje ashtu edhe individi. Nëpërmjet saj është vlerësuar për herë të parë numri i familjeve që janë larguar nga vendi. Rreth 584 mijë familje ose 77,9 % nuk kanë asnjë anëtar që është larguar (emigruar) gjatë periudhës 2011-2019. 166 mijë familje ose 22,1 % kishin në 2019 të paktën një anëtar të larguar jashtë vendit. Nga të gjithë banorët rezident në CENSUS 2011, rreth 2,2 milion individë nuk kanë ndryshuar vendbanimin e tyre të zakonshëm në 2019, që prej 2011 (nuk kanë emigruar/imigruar jashtë vendit ose nuk kanë lëvizur brenda vendit).
Numri i individëve gjithsej të larguar nga Shqipëria, në 2019 rezulton 360.699 banorë, ose rreth 12,4 % e popullsisë gjithsej të vitit 2011.
