Moderatorët janë personazhet më të komentuar të një emisionit, aq sa në jo pak raste e largojnë vëmendjen dhe nga temat që trajtohen në emisionet e tyre. Si u vesh, si qëndroi, çfarë tha apo çfarë gafe bëri, janë disa nga gjërat që komentohen më së shumti jo vetëm midis nesh, por edhe në media.
Duke qenë se ata janë gjatë gjithë kohës të vëzhguar, të gjithë kemi arritur të dallojmë shprehjet, gjestet, apo lëvizjet e tyre identifikuese. Disa nga gjestet më të dukshme të moderatorëve më të njohur shqiptarë janë:
Stilolapsi i Reis Çiços mund të themi pa frikë që është po aq i famshëm sa ai. Prej vitesh në çdo dalje të tij televizive, Reisi shfaqet me një stilolaps të cilin e mban gjithmonë në xhepin e tij të majtë. Në fillim të edicionit informativ ai e nxjerr stilolapsin nga xhepi dhe në përfundim të lajmeve, pasi i përshëndet teleshikuesit, ai sigurohet që ta fusë përsëri stilolapsin në xhepin e tij të majtë. Ky fiksim i Reisit në jo pak raste është kthyer edhe në batutë në skena të ndryshme humori.
Moderatorja Marina Vjollca, e cila pas mbylljes me sukses të emisionit “C’est la Vie” po shijon një periudhë pushimesh, identifikohet nga të gjithë për përshëndetjen e saj me dy gishta në fund të emisioneve të saj. Një gjest që ajo nuk harron ta bëj në mbylljen e çdo programi televiziv që ajo prezanton.
Shikoni gjestin përshëndetës të Marinës në minutën 1:09
Moderatorja Alketa Vejsiu prej 19 vitesh ka ardhur në ekranet tona me bashkëpunimet e saj me regjisoren e njohur, Vera Grabocka, të cilën nuk harron ta falënderojë në çdo dalje të saj publike.
“Faleminderi Vera”, është shprehja që Alketa përdor në emisionet e saj duke e shprehur publikisht mirënjohjen e madhe që ka ndaj regjisores së njohur.
Moderatoren Rudina Magjistari, të cilën prej vitesh e shohim në ekranin e “TV Klan” në drejtimin e emisionit të pasdites që mban emrin e saj identifikohet nga të gjithë me shprehjen e saj të famshme: “Sa bukur, sa bukur”.
Në momentin që të ftuarit futen në studio, apo kur ata prezantojnë ndonjë arritje të tyren, Rudina gjithmonë, gati në mënyrë të pavetëdijshme, thotë: “Sa bukur, sa bukur”.
Në minutë 6:45 dëgjoni shprehjen identifikuese të Rudinës
Moderatori Ledion Liço, i cili pak javë më parë mbylli me sukses spektaklin “The Voice Kids”, në çdo dalje të tij publike, në mbyllje të programit nuk harron shprehjen e tij të famshme: “Zoti iu bekoftë”. Kjo shprehje përdoret aq shpesh nga Ledioni saqë është kthyer në identifikuese të tij.
Moderatori i njohur i emisionit të mëngjesit, “Aldo Morning Show”, Aldon Lipe, i cili preferon që të mos e shfaqë fytyrën e tij në ekran, por shfaqet gjithmonë pas një mikrofoni, në çdo nisje apo përfundim të emisionit të tij ai përdor fjalën përshëndetëse “Tung”.
Gazetarin e njohur Arian Çani prej vitesh e shohim në drejtimin e emisionit të tij, “Zonë e lirë”. Ai mund të ketë ndërruar disa ekrane televizive, por asnjëherë formatin e emisioni të tij. Arian Çani prej vitesh identifikohet me shprehjen “Mirëmbrëma tokësorë. Mirëmbrëma tokësore”, apo së fundmi me shprehjen “putain”, e cila në disa raste është përdorur edhe si batutë në skena të ndryshme humori.
Moderatori Ermal Mamaqi, i cili tashmë drejton një ndër emisionet më të ndjekur në “Tv Klan”, identifikohet me të qeshurën e tij karakteristike.
Dëgjoni të qeshurën e Ermalit në minutën 26:54
Nëse e keni ndjekur emisionin “Top Show”, me siguri do ta keni vënë re zakonin më të çuditshëm të Alban Dudushit, i cili gjatë gjithë kohës kur flet me të ftuarit lëviz sa para-mbrapa. Ai është një ndër moderatorët që e përdor më së shumti gjestikulacionin gjatë komunikimit me të ftuarit. Pikërisht lëvizjete tij sa para mbrapa janë kthyer në një gjest identifikues për të.
