Rusia urdhëroi të shtunën trupat e saj të përparonin në Ukrainë “nga të gjitha drejtimet” pasi kryeqyteti ukrainas Kiev vendosi një shtetrrethim të plotë dhe zyrtarët raportuan 198 të vdekur civilë.
Banorët e Kievit u strehuan para zhurmës së shpërthimeve, ndërsa ushtria e Ukrainës tha se kishte frenuar një sulm ndaj kryeqytetit, por po luftonte “grupet sabotuese” ruse që kishin depërtuar në qytet.
Moska tha se kishte lëshuar raketa lundrimi në objektiva ushtarakë dhe do të “zhvillonte ofensivën nga të gjitha drejtimet” pasi akuzoi Ukrainën se kishte “refuzuar” bisedimet.
Por, në ditën e tretë të pushtimit të Rusisë, presidenti sfidues ukrainas Volodymyr Zelensky u zotua se vendi i tij nuk do t’i dorëzohej kurrë Kremlinit.
Zelensky foli në një video-mesazh, i veshur me veshje të stilit ushtarak të gjelbër ulliri dhe dukej i lodhur, por i vendosur.
“Unë jam këtu. Nuk do të lëmë armët. Ne do të mbrojmë shtetin tonë, sepse armët tona janë e vërteta jonë”, tha 44-vjeçari.
“E vërteta jonë është se kjo është toka jonë, vendi ynë, fëmijët tanë dhe ne do t’i mbrojmë të gjitha këto.”
Ai më vonë tha se Ukraina e kishte “zhbërë” planin rus për përmbysjen e tij dhe u kërkoi rusëve të bënin presion ndaj Putinit që të ndalonte konfliktin.
