Radio Televizioni Shqiptar transmetoi pak ditë më parë një film me dy minorenë homoseksualë.
Duke qenë se qershori është muaji i krenarisë, pra i ndërgjegjësimit për të drejtat e komunitetit LGBT, televizioni shqiptar transmetoi filmin që trajton marrëdhënien e dy djemve minorenë.
Por filmi me metrazh të shkurtër nuk është pritur mirë nga gazetari Klodian Tomori, i cili ka reaguar ashpër kundrejt Radio Televizionit Shqiptar.
Ai kundërshton hapur promovimin e kësaj lloj marrëdhënie sidomos tek minorenët dhe për më tepër e quan të pështirë atë:
“Kjo është e pështirë, e ndyrë, e neveritshme dhe madje barbare. Kjo është më e shëmtuar edhe se vetë TVSH-ja.
Qeveria shqiptare takson çdo familje të këtij vendi, përfshirë ato në nevojë, që të subvencionoje televizionin publik. Janë 10 milionë euro taksa në vit, që paguhen nga të varfër dhe të pasur”, shkruan ai.
Koalicioni Shqiptar Për Shqipërinë shkruan gjithashtu në Facebook, se do të paraqesë një ankesë te AMA për të ndaluar transmetimin e filmave të tillë pasi ndikojnë te seksualiteti i fëmijëve.
