Në një deklaratë për mediat ditën e sotme, kryeministri Rama ka bërë të ditur se pagat për bluzat e bardha do të rriten me 40%, ndërsa pagat për arsimtarët me 15%.
Rama njoftoi gjithashtu se fondi i i përgjithshëm i pagave në sektorin publik është dyfishuar në dy mandate qeverisëse.
“Sot zyrtarisht njoftojmë rritjen e pagave për të gjithë bluzat e bardha dhe për arsimtarët. Në këto kushte pavarësisht shtrengesave të krijuara nga dy goditje njëra pas tjetrës, tërmeti dhe Covid, kemi detyrimin që t’ju japim sot një mbështetje të fortë për të shpërblyer mundin, profesionalizmin, angazhimin me dy kategori shoqërore, një kategorie lëvizshme dhe një kategori e palëvizshme që janë femijët, si dhe për të nxitur motivimin dhe cilësinë në rritje të dy shërbimeve jetike për të sotmen dhe të ardhmen.
Paga për bluzat e bardha do të rritet 40% dhe paga për arsimtarët e sistemit parauniversitar me 15%.
Me një numër punonjësish në sektorin publik që është më i vogël se sa numri i punonjëse në vitin 2013, fondi i pagave i përgjithshëm është rritur nga 450 milionë dollarë në 2013 në 710 milionë dollarë sot. Që do të thotë në dy mandate qeverisëse është thuajse dyfish fondi i pagave në sektorin publik, me të njëjtin numër punonjësish, që po e marrim gati njësoj me vitin 2013.
Shifra e tretë që dua t’iu jap, kursimi nga taksimi i ndershëm në Shqipëri është 21 milionë dollarë në vit, dhe 166 milionë dollarë në këto vite.”
Kryeministri bëri gjithashtu të ditur se këto ndryshime do të futen në fuqi duke filluar nga 1 janari i vitit 2021, ndërsa detaje të tjera do të bëhen të ditura gjatë javës së ardhshme.
Në fund të muajit korrik revista “Monitor”, botoi një vështrim krahasues të pagave në vendet e rajonit tonë për vitin 2019. Paga mesatare në aktivitetin e “Shëndetësia dhe veprimtari të tjera sociale” në Shqipëri është 435 euro, është afërsisht sa gjysma e mesatares rajonale. Vitin e kaluar, edhe Kosova i rriti ndjeshëm pagat e mjekëve dhe infermierëve, me synim ndalimin e eksodit të bluzave të bardha.
Burimi: Institucionet statistikore përkatëse, përpunime të Monitor
Megjithatë, analiza e studime të shumta e rendisin shumë keq Shqipërinë në përfundimet e tyre, sa i përket trajtimit të bluzave të bardha. Instituti i Vienës për Studime Ekonomike Ndërkombëtare arriti në përfundimin se në Shqipëri, ata që kujdesen për shëndetin e njerëzve paguhen më pak se 20% e asaj që paguhen të njëjtat profesione në 15 vendet më të zhvilluara të Bashkimit Europian.
Asnjë vend tjetër i Europës apo Ballkanit Perëndimor nuk ka një normë kaq të ulët sa vendi ynë dhe askush nuk zbret nën 20%. Pra, në linja më të përgjithshme, me pagën që merr në Shqipëri, një mjek dhe infermier shqiptar mund të blejnë diçka më shumë se 15% të asaj që blejnë kolegët e tyre, në Finlandë, dhe diçka më pak se 10% të asaj që blejnë kolegët e tyre në Luksemburg. Duket se kjo është edhe një prej arsyeve kryesore të valës së largimit të këtyre profesionistëve nga vendi ynë dhe i gjithë rajoni gjatë viteve të fundit.
Bluzat e bardha ZERO shpërblim për punën e tyre gjatë pandemisë
Më 14 korrik vendimi i Francës për një rritje historike të pagave për bluzat e bardha do bëhej kryelajmi i medieve të mëdha ndërkombëtare. Sipas BBC, Franca miratoi rritjen e pagave me një vlerë prej 8 miliardë eurosh për punonjësit e shëndetësisë, ndërsa qeveria ka vlerësuar rolin e tyre në luftën kundër koronavirusit.
Ndërkohë në Shqipëri, bluzave të bardha iu premtua një shpërblim, por shumë mjekë dolën në protesta pasi nuk e morën atë me pretendimin se nuk ishin në vijën e parë të frontit. Nga ana tjetër, nga QSUT në Tiranë dhe nëpër spitalet e poliklinikat e shumë rretheve, ata janë infektuar dhe në raste ekstreme edhe kanë humbur jetën.
Me anë të një statusi në Facebook, mjeku i mirënjohur Tritan Kalo ka kërkuar aso kohe që Shqipëria të bëjë të njëjtën gjë si Franca, duke shtuar se paga e tij nuk ishte rritur që prej vitit 2013. Po ashtu, Kalo shtonte se është i bindur se shumë mjekë e infermierë do ta rishohin si mundësi optimale largimin nga vendi, sikundër edhe ka ndodhur deri më tani. Ai bëri thirrje që qeveria të reagojë, pasi burimet njerëzore cilësore nuk janë të pashtershme më fushën e dhënies së përkujdesit mjekësor.
