Rritja e tepruar e çmimeve solli revoltë në popullin shqiptar, që vuan edhe njëherë pasojat e një qeverie të korruptuar.
Në vend që të ndihmojë qytetarët e t’i gjendet pranë në ditë të vështira për të mbajtur bizneset gjallë, qeveria vjedh hapur nga xhepat tanë dhe nuk dënohet askush.
Pas padrejtësisë që u bë me bizneset në pandemi, kur ca u trajtuan si të nënës e ca si të njerkës, tashmë tjetër goditje vjen nga rritja e çmimeve.
Dita ditës, restorantet në vend po falimentojnë dhe po mbyllen, ndërsa askush nuk ka ngritur dorën t’i mbrojë apo ndihmojë.
Rritja e çmimeve po reflektohet në gjithçka. Madje, edhe club-et e natës që megjithëse nuk cënohen momentalisht nga rritja e çmimeve, janë goditur dy vite prej konkurrencës së pandershme e korruptive.
Në kohë pandemie, policia gjobiste e mbyllte bizneset e hapura jashtë orarit të lejuar me urdhër të qeverisë, ndërsa për disa biznese të tjera bënte një sy qorr, duke i lejuar të bëjnë konkurrencë të pandershme.
Teksa disa biznese lulëzuan edhe në kohë pandemie, pjesa tjetër akoma nuk ngrejnë dot kokën dhe po detyrohen të mbyllen me rritjen e tanishme të çmimeve.
Ndërkohë që në vende të tjera të botës qeveria i bëhet krahë bizneseve të vendit, në Shqipëri qeveria i jep goditjen përfundimtare, për t’i shkatërruar njëherë e mirë.
