6 të mitura kanë rënë pre e sulmeve seksuale vetëm muajin e parë të vitit 2024. Në Divjakë një e mitur 14 vjeç ishte martuar ndërkohë në Pogradec një 12-vjeçare ishte abuzuar seksualisht nga djali i bashkëjetueses së nënës.
Ndërkohë tronditës ishte dhe rasti i shfrytëzimit seksual që i ishte bërë për gati 2 vite një vajze tani 16 vjeç nga mjeku 42-vjeçar duke e prezantuar si gruan e tij të 4. Nga ana tjetër 3 të mitura 15, 16, 17 vjeç në një fshat të Fushë Krujës shfrytëzoheshin për prostitucion për rreth 6 muaj nga 4 të rinj.
Të gjitha këto raste kanë sjellë në vëmendje kodin penal, i cili një marrëdhënie seksuale me një të mitur mbi 14 vjeç nuk e cilëson kriminale. Eksperti i kriminalistikës, Ervin Karamuço thotë:
Duke vendosur në ligj moshën 14 vjeç si moshë e lejuar për dakordësinë për të kryer marrëdhënie seksuale, deri në 18 vjeç ky ligj ka një vakum. Ka mangësi gjithashtu në lidhje me diferencën që ka personi që hyn në marrëdhënie me të miturin. Nuk e cakton sa duhet të jetë. Duhet hequr edhe përcaktimi për pjekurinë seksuale se në këtë formë ulet akoma mosha dhe mjekësia ligjore detyrohet të nxjerrë raporte të sforcuara për të justifikuar marrëdhënie
Gazetarja e Top Channel, Dorjana Bezati mëson ekskluzivisht se kodi penal do të ndryshojë dhe seksioni i krimeve seksuale nga 8 nene që ka tani do të ketë 23. Sipas Draftit të hedhur për diskutim që Top Channel disponon, mosha për të shprehur dakortësinë për të hyrë në një marrëdhënie seksuale do të rritet nga 14 në 16 vjeç. Po ashtu parashikohet të rritet edhe dënimi.
