Historia e vdekjes misterioze të 16-vjeçares nga Saranda, Kostandina Anagnosti, duket së është drejt zbardhjes. Ndërsa hetimet në Shqipëri nuk kanë zbuluar asgjë, shteti grek i jep familjarëve një shpresë se përgjegjësit për vdekjen e vajzës së tyre do të përballen me drejtësinë.
Në 14 nëntorin e 2014-s Kostandina u nis me bashkëjetuesin e nënës së saj, Spiro Papas, nga Janina drejt Sarandës. U tha se 16-vjeçarja do të shkonte te dentisti por rezultoi se qëllimi i vërtetë i vizitës ishte aborti në klinikën private të qytetit. Rrugës së kthimit në Janinë shoferi i taksisë, Spiro Papas, deklaroi se Kostandina humbi ndjenjat. Ai vendosi të kthehet në Spitalin e qytetit të Sarandës, por aty mbërriti pa jetë.
Babai i 16-vjeçares hedh akuza të forta se vajza e tij u masakrua në morgun e Sarandës, ku iu hoqën thuajse të gjitha organet, disa iu zëvendësuar me organe jo të sajat, për të bërë të pamundur ekspertizën për përcaktimin e shkaqeve të vërteta të vdekjes.
Këtë duket se provojnë edhe fotot e publikuara nga “newsbomb.al” të ekspertizës mjeko-ligjore të kryera në Janinë. Në foto dallohen përveç çarjeve në pjesë të mëdha të trupit dhe kokës, shenja mavijosje në qafën e viktimës, çka ngre dyshime se mbi të mund të jetë ushtruar dhunë apo forcë.
Ngjarja bëhet edhe më komplekse kur rezulton se analizat toksikologjike në Tiranë të Kostandinës kanë dalë të pastra, ndryshe nga analizat në Greqi ku ka rezultuar trefish më tepër dozë anestezie në trupin e saj.
Doktor Elmas Shaqiri ishte eksperti i parë që këqyri trupin e pajetë të adoleshentes. Ai doli në konkluzionin se mbi Kostandinën nuk ishte ushtruar dhunë dhe se shkaku i vdekjes është arresti kardiak.
16-vjeçares i mungonin organe si truri i madh, i vogël, laringu, faringas, zemra, mitra, vezoret, stomaku, etj.
Burimi: Newsbomb.al
