Prej disa ditësh, Tirana është tronditur prej vrasjes makabre të 26-vjeçarit Indrit Çelaj i cili u ekzekutua teksa rregullonte një kondicioner në ambientet e një vile në rrugën “Myslym Shyri”.
Dy të dyshuarit për vrasjen e të riut, të cilët janë në arrati, janë dy djemtë e pronarit të vilës ku ndodhi krimi, Griseldo Kusi dhe Albano Kusi.
Sakaq ditën e sotme, gjatë senacës ku u lanë në burg Bujar Kusi (babai i të dyshuarve), Ferdinand Bakalli e Ali Sula (dy punëtorët e vilës) për “moskallëzim krimi” e “veprime që pengojnë zbulimin e së vërtetës”, një prej punëtorëve që ka qenë prezent në momentin e ekzekutimit të të riut, ka rrëfyer skenën e tmerrshme të vrasjes për motive të dobëta.
Në dëshminë e siguruar nga “News 24”, punëtori mësohet të ketë rrëfyer:
“Ishim duke punuar në katin e parë të vilës kur erdhi Griseldo Kusi, djali i pronarit të objektit, i cili vinte shpesh për të na kontrolluar. Pasi na përshëndeti, u dëgjua zhurma e një trapani nga një prej tualeteve dhe Griseldo i nervozuar shkoi drejt punëtorit që po hapte një vrimë. Në atë moment ai ka nisur t’i bërtasë duke i thënë: ‘Përse po e hap atë vrimë aty? Ku do e çosh ujin e shkarkimit të kondicionerit?’ Ndërsa djali i është përgjigjur qetësisht se nuk e dinte. Më tej Griseldo Kusi i ka thënë: ‘Po kur nuk e i ti, si ta di unë?!’. Në atë moment ai ka nxjerrë armën dhe e ka qëlluar në kokë. Pasi e qëlloi, mori gëzhojën dhe doli me një çantë në dorë.”
Të njëjtën skenë ka përshkruar dhe punëtori i dytë dëshmitar në ngjarje i cili nuk ka mundur të shohë ekzekutimin, por ka dëgjuar të bërtiturat e Griseldo Kusit dhe më pas të shtënën e armës.
