Ishte një nga lajmet që tronditi opinionin publik, madje do të mbetej i pabesueshëm nëse nuk do të kishte veprime konkrete të institucioneve policore shqiptare për të mbrojtur të moshuarën Zhane Zari, nga vajza e saj, këngëtarja e mirënjohur Eda Zari.
Po sipas policisë dhe drejtësisë shqiptare Eda Zari ka dhunuar nënën e saj dhe policia e shtetit ka lëshuar një urdhër mbrojtje, ku e detyron këngëtaren e jazz- it t’i qëndrojë nënës së saj 500 m larg. Po kështu është një vendim i shkallës së parë ku dënon Eda Zarin me 6 muaj heqje lirie.
Zhane Zari foli për herë të parë publikisht duke akuzuar hapur të bijën se e ka dhunuar, ka dashur ta mbysë, dhe se u ka marrë padrejtësisht pronat prindërve duke i lënë në mes të katër rrugëve.
“Vinte në shtëpi dhe më thoshte: “do shkoj të shtrihem se jam lodhur, futej në dhomë dhe e mbyllte me çelës. Unë aty kisha gjithë dokumentet në një çantë. Ajo kontrollonte andej këtej, ç’të gjente dokumente e merrte dhe e zhdukte. Mori dokumentin e shtëpisë, mori faturat, gjithçka kishim”, u shpreh Zhane Zari në një deklaratë ekskluzive për “Report TV”.
Sipas mamasë, konflikti kishte nisur kur e bija kishte sjellë në shtëpi dikë që ia kishte prezantuar si shok, ndërkohë që ishte e martuar. Zhane Zari thotë se e kishte kundërshtuar të bijën sepse nuk donte që ajo të mbante një lidhje jashtë martese dhe pas kësaj kishte ardhur edhe akti i rëndë i dhunës sepse e bija i kishte futur duart në fyt.
“E solli në shtëpi. I thashë “ç’e ke këtë?”, më tha: “Është shoku im”. I thashë: “Po ç’shok, ti ke burrin”. Aty më mori inat, sepse unë nuk e lija të merrte shokun në shtëpi.”, tregon ajo, “Pastaj filloi të më bërtiste, të bënte si e çmendur: “E di ç’të bëj unë ty?”. Dhe më futi duart në fyt.”
Në maj, këngëtarja iu kundërpërgjigj lajmeve në media me një shkrim të gjatë në sajtin “Peizazhe të fjalës”, ku u hakërrehej mediave që flasin për aspekte personale të jetës së saj duke denigruar imazhin e mamasë së saj, ndërsa edhe theksonte se askush s’donte t’ia dinte për të ëmën.
“E para: mua më vjen keq që është fëmija im. E dyta, të të bëjë vajza që je me sklerozë…unë kam raport nga mjeku neurolog që jam në rregull. Ajo le të kontrollohet për vete.”
Por historia nuk përfundoi aty. E bija i ka marrë të gjitha pronat që kishin: një shtëpi në Durrës, shtëpinë ku jetonin në Tiranë si edhe një ambient për dyqan të cilin e lëshon me qira dhe i merr vetë fitimet.
Sipas Zhane Zarit, ata e kanë hedhur në gjyq për kthimin e pronave por e bija ka manipuluar avokatët dhe noterët, të cilët i kanë gënjyer me lugën bosh.
“Nëqoftëse i ka ardhur mendja në vend, duhet të m’i sjellë të gjitha dokumentet, të bëhen jo për mua, jo për atë, por ashtu siç i takon, sepse edhe ajo ka pjesën e saj. Më ka lënë pa bukën e gojës.”
Burimi: Report TV
