Dëshira më e madhe e saj ishte të bëhej nënë. Prej më shumë se tetë vitesh Eva, kishte vizituar çdo spital në çdo cep të botës që ta bënte realitet ëndrrën e saj.
“Kisha pas shpatullave 12 fekondime in vitro negative, isha mbushur plot me hormone, sistemi nervor nuk mbante më. Gjatë këtyre 8 viteve, qava, u bëra armike me Zotin, jetoja me pyetjen Pse duke mos pasur asnjë arsye shëndetësore, u bëra xheloze me ato gratë që më dilnin përpara me barkun e madh se pse ato Po, dhe unë Jo” tha Eva.
E ftuar në rubrikën “Ka një mesazh për ty”, Eva rrëfeu se pas ndarjes nga jeta të së atit gjashtë vite më parë, ai i kishte dalë në ëndërr duke i thënë që të vazhdonte me përpjekjet për t’u bërë nënë edhe pse ajo i kishte humbur të gjitha shpresat.
“Çdo natë më thoshte, shko të keqen babi se do bësh një vajzë të bukur do ia vësh emrin Jasemina. Vajta tek halla ime e madhja dhe i tregova. Ajo më tha “të keqen halla nisu se babi të ka dhënë bekimin. Ai ka shkuar atje për të të dhënë një fëmijë. U bëra shumë keq, nuk doja të ikja sepse mendoja se do ndërroja babain me fëmijën” -u shpreh Eva.
Niset për në Turqi vetëm për hir të ëndërrës së babait, edhe pse doktoresha atje nuk ishte dakord që ajo të provonte sërish për shkak të historisë së saj të gjatë të fekondimeve që kishin arritur në 12, shkruan Panorama.
“Pas 2 javësh shkoj për të marrë përgjigjen. Doktoresha më tha se isha shtatzanë me dy binjakë. Më besoni, tre muaj në çdo natë shkoja babi që më vinte duart në bark”, tregon ajo. Babai i kishte thënë në ëndërr se do bënte një vajzë me emrin Jasemina. Në muajin e tretë të shtatzanisë ajo humb njërin nga bebet që ishte djalë, por nuk u ligështua.Tashmë Eva është nënë e dy fëmijëve, të Jasëminës 5 vjeçare dhe një djali që është pothuaj 3 vjeç.
