Nëna e terroristit të 3 të sulmit të Londrës është rrëfyer për herë të parë lidhur me ngjarjen e rëndë. Ajo u shpreh se ishte e shokuar për gjithçka që ndodhi dhe nuk e dinte se djali i saj, Youssef Zaghba, kishte qenë pjesë e atij grupi.
Ajo tregon se u shokua kur mësoi se i biri ishte njëri nga vrasësit e sulmit në Londër, ku humbën jetën 8 persona.
68-vjeçarja, e tronditur u përpoq të gjente fjalët e duhura për të ngushëlluar familjarët e viktimave.
“Nuk kam fjalë. Ai u takua me njerëzit e gabuar. Se di çfarë i kanë bërë atij. Nuk ma merrte kurrë mendja se ai do të bëhej terrorist”, u shpreh ajo për CNN.
Edhe pse e ëma i njihte mirë ideologjitë e tij, ajo tregon se ai kurrë nuk ka shfaqur shenja urrejtjeje për shoqërinë perëndimore.
Duket se 22-vjeçari e kishte lajmëruar familjen se do të shkonte në Siri për të jetuar në një shtet islamik perfekt, ku do të punonte dhe do të krijonte familjen e tij.
Një ditë para sulmit, Zaghba në vend që t’i dërgonte mesazhe siç bënte zakonisht, e ka telefonuar mamanë duke folur për gjëra që në atë moment tingëllonin të çuditshme për të, por që më pas ajo lidhi çdo detaj dhe u bind se ishte telefonata e tij e lamtumirës.
