Shumica e njerëzve që vlejnë 240 milionë paundë punësojnë njerëz për t’i ndihmuar me shtëpinë. Por nëna e katër fëmijëve Victoria Beckham dëshiron që të kujdeset vetë pas fëmijëve, pavarësisht se sakrifikon jetën e saj sociale.
Ish-anëtarja e Spice Girls, 42-vjeçarja, ka katër fëmijë, Brooklyn, 17 vjeç, Romeo, 14 vjeç, Cruz, 11 vjeç dhe Harper, 5 vjeç dhe kujdeset për ta bashkë me të shoqin, David.
Duke folur për Sunday People ajo rrëfen: “Nuk kam një jetë sociale. Katër fëmijët e mi dhe David janë prioriteti im numër një. Unë jam atje ku ata kanë lojëra, apo në takimet me prindërit në shkollë. Unë dhe David jemi rrallë në udhëtim në të njëjtën kohë. Ne i bëjmë bashkë detyrat e shtëpisë, kohën e dushit dhe gjumin”.
Stilistja thotë se e çon vetë Harper në shkollë me motorin e saj skuter dhe i thotë mirupafshim tek gardhi i shkollës. “Të paguash dikë që të bëjë këto gjëra për të të lehtësuar ty nuk është e gabuar, por ata janë shumë të rëndësishëm për mua”, thotë Victoria.
Madje Victoria thotë se ajo mbështetet te bashkëshorti David, i cili kujdeset ai për fëmijët, kur ajo ka ndonjë takim apo duhet të bëj ndonjë trajtim bukurie për “problemet me lëkurën”.
Ajo thotë se nuk ka bërë kurrë operacione në fytyrë, përveç disa ndërhyrjeve për zmadhimin e gjoksit, sepse ajo nuk dëshiron të ketë fytyrën e një 25-vjeçareje kur të jetë 70 vjeç.
Duket se Victoria ka ndryshuar pikëpamje për ndihmën, pasi pranoi në 2013-n se punësoi një dado dhe një ndihmëse për shtëpinë, si dhe një shef kuzhine. Ajo tha në atë kohë: “Është e vështirë të punosh, të kesh fëmijë, të kesh një bashkëshort që udhëton. Më ndihmojnë pak, kam një dado, nuk mund ta bëj të gjithën vetë”.
Burimi: Daily Mail
