Kryetari i Partisë Demokratike Lulzim Basha deklaroi se artistët shqiptarë janë mashtruar në lidhje me peticionin e firmosur për ndërtimin e teatrit të ri kombëtar.
Dhe menjëherë pas deklaratës së tij aktori i mirënjohur i skenës shqiptare, Robert Ndrenika reagoi përmes një statusi në Facebook ku I tregonte Bashës se ai kishte marrë “besën e shqiptarit” dhe nuk dyshon në ndërtimin e një teatri me kushte bashkëkohore. Prandaj ai e fton me ironi kryetarin e PD t’i vënë minat nëse teatri për të cilin aktorët shqiptarë firmosën nuk do të ndërtohet.
“I dashur Zoti Lulzim Basha ! Të falenderoj shumë që më hape sytë dhe më rrite vigjilencën në lidhje me bisedimet që kam bërë me Kryetarin e Bashkisë për ndërtimin e Teatrit të Ri Kombëtar. Sic të kam bërë me dije kam shkelur mbi vehten time dhe kam rënë dakort që Teatri të ndërtohet me PPP (ndonëse dhe sot jam i bindur se Teatrin e ka për detyrë ta ndërtojë SHTETI SHQIPTAR). E kam bërë këtë dakordësi me kushtin që të mos jepet asnjë centimetër katror për ndërtim KULLASH dhe për këtë kam marrë BESËN e SHQIPTARIT. Në rast se shkelet kjo BESË(që nuk është e mundur) shpreh gatishmërinë për të marrë pjesë në aksionin e vendosjes së minave për të rrëzuar KULLAT.
Për ta vertetuar që nesër jam i gatshëm të minojmë kullën që ka ngritur PPP -ja te stadiumi Qemal Stafa. Sa për Piramidën ka më tepër se 10 vjet që shoku Fatos Nano (ish Kryeministër) na e ka rekomanduar për Teatër, por ajo nuk i plotëson kushtet. Personalisht (pak a shumë) i kam kryer detyrat, por më vjen keq për të rinjtë që bien viktima të sherreve politike dhe që ka shumë gjasa ta ngrysin jetën artistike (ndoshta për 70 vjet të tjera) tek i ashtuquajturi “teatër Turbina” .
Me respekt Robert Ndrenika” – shkruan Ndrenika në statusin e tij në Facebook.
