Rita Ora lajmëroi disa ditë më parë se në 12 shkurt do të publikonte një mini-album të ri, për të cilin ka bashkëpunuar me disa emra shumë të njohur të muzikës. Artistja zbuloi se projekti i ri mban titullin “Bang” dhe se për të do të bashkëpunojë me Imanbek dhe artistë të tjerë të njohur si David Guetta, Gunna etj.
Rita ka treguar se ky projekt i ri do të jetë një miks midis popit modern, kulturës së viteve 80-90 dhe muzikës house. Këngëtarja e ka mbajtur fjalën dhe duket se në të do të ketë një përzierje të vërtetë kulturash, ku sigurisht nuk mund të mungonte as ajo shqiptare. Rita ka publikuar së fundmi një trailer të mini-albumit të saj, që i ka bërë fansat shqiptarë të artistes të fluturojnë nga gëzimi.
Në videon e publikuar Rita shihet e veshur me kostume popullore, ndërkohë që rrethohet edhe nga disa persona të tjerë të veshur me kostume tradicionale shqiptare. Këngëtarja shihet duke pozuar krenare me veshjet popullore shqiptare, ndërsa fansat e saj janë shprehur shumë të lumtur që ka zgjedhur të promovojë traditat në një mënyrë kaq të bukur.
View this post on Instagram
Pas kësaj videoje të gjithë u bëmë kuriozë të dimë se çfarë do të ketë në këtë mini-album të Ritës dhe nëse do të përfshijë edhe ndopak ritme shqiptare në këngët e saj. Ky projekt i ri do të lançohet i plotë në 12 shkurt dhe këngëtarja ka ftuar fansat që ta porosisin paraprakisht.
