Imazhi i saj po bëhet pjesë e kopertinave të revistave më prestigjioze të modës. “Vogue Italia” ka zgjedhur këngëtaren Rita Ora si imazh për revistën e muajit shtator. Lajmin e ka shpërndarë vetë Rita në Instagramin e saj duke postuar dy foto të kopertinës së revistës prestigjioze.
Në artikullin kushtuar këngëtares shqiptare shkruhet se vajza me origjinë shqiptare arriti të bëhet e suksesshme pasi erdhi si refugjate bashkë me familjen në Londër.
“Në dukje Rita Ora është shprehja e një vajze moderne, e re që nuk kufizohet në muzikë dhe që pa frikën se mund të ekspozohet shumë dhe pa snobizëm, është përfshirë në modë (në një bashkëpunim me Adidas), në televizion (anëtarja e jurisë në “X Factor” dhe në ” Voice “) në aktrim (është Mia, motra e Christian Grey te ‘Fifty Shades of Grey”) dhe reklama (fytyra e Material Girl, linja e modës së Madonës, por ka punuar edhe për Roberto Cavalli dhe Rimmel)”.
Gjëja më e vështirë për t’u menaxhuar sipas Ritës, është keqkomunikimi: “Çfarëdo që unë them, analizohet dhe interpretohet në mënyrën e gabuar. Problemi është që unë nuk mund ta kaloj jetën duke sqaruar mendimet e mia. Nëse e bëj këtë nuk do të kem kohë për gjë tjetër. Pra, e lë të shkojë. Funksionon por duhet të kesh një lëkurë të regjur”, është shprehur këngëtarja.
Rita ka folur edhe për ish-producentin e saj, Jay-Z, të cilin e hodhi në gjyq:
“Leksioni që kam mësuar është që gjithmonë i kushtoj vëmendje instinkteve të mia: në qoftë se do të kthehesha mbrapa nuk do të nënshkruaja një kontratë të tillë. Shpesh më kanë premtuar hënën, por në fund nuk kam marrë asgjë. Kështu kuptova që nëse do të doja të ndryshoja jetën time duhet të mendoja për veten”.
2016-a ka qenë një vit i suksesshëm për këngëtaren shqiptare. Pak ditë më parë ajo ka interpretuar në Vatikan në ditën e shenjtërimit të Nënë Terezës dhe e ka vlerësuar si një ndër performancat e jetës së saj.
*Shfleto galerinë
