Këngëtarja shqiptare është kritikuar nga fansat dhe miqtë e kampionit të arteve marciale, Conor McGregor, pas disa fotove të fundit të publikuara në profilin e saj në Instagram.
Dyshja ishin të pranishëm në ceremoninë që u mbajt në Londër mbrëmjen e së hënës, “Fashion Awards 2017”, ku rastisën në të njëjtën tryezë. Sigurisht që nuk ishin vetëm, pasi me ta ishte dhe modeleja Jordan Dunn.
Por fotot e publikuara nga Rita me mbishkrimin: “Shoqëruesi im”, janë keqinterpretuar nga fansat e tij dhe disa miq, të cilët shkruajnë se kjo është një fyerje për partneren e McGregor, me të cilën sportisti ka dhe një fëmijë.
Artem Lobov, partneri i sparingut i McGregor ka bërë një “tweet” sulmues ndaj Ritës, duke e krahasuar atë me “hamburger” teksa aludoi që McGregor ka “mishin” në shtëpi duke ju referuar të dashurës Dee Devlin.
“Më fal Rita, hamburgerët janë të mirë, por jo kur ke mishin në shtëpi”, u shpreh Lobov në rrjetin social Twitter.
Të tjerë adhurues të McGregor vazhduan me kritikat dhe nuk mirëpritën imazhet duke i quajtur mos respektuese.
“Një ofendim i madh për të dashurën. Shumë komode po shihet Rita”, ka shkruar një fans, teksa një tjetër vazhdoi: “Seriozisht shumë ofenduese për partneren dhe nënën e fëmijës së tij”.
