Rina dhe Adelina Ismajli janë dyshja që nuk na e merrte mendja se do t’i shikonim bashkë këtë verë.
Por ndërsa artistja 39-vjeçare është treguar shumë e përzemërt duke thënë se 19-vjeçarja Rina Balaj ia rrëmbeu zemrën me sjelljen, Rina rrëfeu sot për herë të parë tek “Rudina” si ia vuri qëllim vetes të realizonte një bashkëpunim me divën e muzikës shqiptare, fillimisht pa i thënë asaj asgjë.
Sikurse tregoi edhe Adelina, ato u njohën tek parukieri i përbashkët, Nagipi, që është parukieri që Adelina ka frekuentuar historikisht.
“Unë dhe Adelina e patëm një lidhje të veçantë që më fillim.”, u shpreh Rina.
Ajo që i kishte bërë Rinës përshtypje ishte thjeshtësia e Adelinës, e cila sipas reperes së re ndryshon shumë nga artistët e tjerë me karrierë që ka takuar.
“S’e kam besuar që Adelina ishte aq e mirë dhe aq e hapur me të rinjtë. E them sepse artistët tanë që janë prej vitesh në skenë e kanë pak atë: “M’fal po unë jam shumë famous, për momentin s’t’foli.”
Pas kësaj, Rina e dinte se ç’duhej të bënte.
“Kam shku n’studio edhe u kam thënë: “kam një ide shumë t’fortë”. Akoma pa e folur me Adelinën, pa i thënë se shiko, dua të bëj një këngë me ty.”
Dhe kështu, pa i thënë asgjë Adelinës, Rina e regjistroi demon e këngës “Qikat” duke e kënduar vetë pjesën e Adelinës, “Ani qika ani”, që më pas t’ia tregonte asaj.
“Adelinës i ka pëlqy ekstrem që në momentin e parë.”
“Qikat” u publikua një javë më parë.
