Në rrjet qarkulloi me shpejtësi lajmi se Rihanna do të bëhej pjesë e serisë së dytë të filmit “Black Panther”. E gjitha nisi pasi në një kërkim në ‘Google’, emri i saj rezulton në grupin e aktorëve. Njëri prej komentuesve në rrjetin social Twitter shkroi: “Nuk e kam parë kurrë Rihannna duke aktruar. Si e kaloi audicionin për filmin Black Panther 2?”.
Kaq mjaftoi që të gjithë të shpresonin ta shihnin Rihanna-n në ekranin e madh të kinematografisë, mirëpo kjo nuk është e vërtetë.
Nuk do të thotë se çdo gjë që shfaqet në internet është e vërtetë dhe nuk ka asnjë provë reale që dëshmon pretendimet e fansave të Rihanna-s për filmin. Këngëtarja është shumë e njohur për muzikën e saj dhe asaj i është dashur shumë kohë që të pranojë të dalë para ekranit të madh. Para pak kohësh ajo luajti në filmin “Ocean’s 8” bashkë me Mindy Kaling dhe Awkwafina.
Prodhimi për Black Panther 2 është vendosur të fillojë në korrik 2021 në Atlanta. Filmi po planifikon paraprakisht një dalje në 2022. Me vdekjen e aktorit kryesor Chadwick Boseman në gusht, skenari për filmin duhej të rishkruhej i gjithë dhe ende nuk dihet shumë për të.
