Katër muaj pas emërimit në shkelje flagrante të ligjit, pozitat e Alfred Peza në krye të RTSH ka nisur të lëkunden.
Një grup punonjësish të RTSH-së, të shkarkuar në mënyrë arbitrare dhe në kundërshtim flagrant me ligjin nga ai kanë firmosur një peticion, përmes të cilit kërkojnë shkarkimin nga detyra të drejtorit të RTSH-së Alfred Pezës.
Peticioni i është drejtuar Këshillit Drejtues të RTSH-së me në krye Leka Bungon, i emëruar edhe ky në shkelje të ligjit, por që gjithsesi ka vendosur të distancohet nga “regjimi” i Pezës.
Këshilli Drejtues i RTSH është para një prove të madhe nëse do të anojë në krah të interesit publik, barazisë para ligjit, respektit për taksapaguesit, dinjitetit dhe të drejtave të punonjësve apo do të mbështesë spastrimet e drejtorit të RTSH-së.
Madje shumica e anëtarëve të Këshillit Drejtues, deri më tani, ka refuzuar dy herë miratimin e shkarkimeve dhe emërimeve klanore të Pezës si dhe pseudoreformën e tij.
Gjatë 4 muajve në krye të RTSH, Peza ka sajuar deri tek shkaqe nga më banalet duke shkarkuar dhjetëra punonjës me përvojë të gjatë pune, profesionistë dhe familjarë.
Janë hequr nga puna punonjës për përkatësi fetare, janë hequr nga puna për një postim në rrjetin social Facebook, për disa minuta vonesë, se pse nuk kanë mbyllur një derë, pse nuk kanë “nderuar” drejtorin kur kalon nëpër korridore etj.
Emërimet dhe shkarkimet skandaloze të Pezës, të pasqyruara në media, kanë shqetësuar edhe kryeministrin Rama, i cili mësohet se ka kërkuar që t’i jepet fund kësaj situate.
