Numri i të vdekurve nga tërmetet e së hënës (6 shkurt) në Turqi dhe Siri ka kaluar tashmë 24,178 persona, ndërsa 80,052 persona janë të plagosur.
Zyrtarët turq dhe mjekët thonë se 20,665 njerëz kanë vdekur atje për shkak të tërmetit, ndërsa ka pasur 3,513,të vdekur në Siri, sipas agjencisë së lajmeve AFP.
Ndërkohë vijojnë operacionet e shpëtimit në 10 provincat e Turqisë të prekura nga tërmeti shkatërrues, me shpresën për të shpëtuar sa më shumë njerëz.
Me herët xhiron e rrjetit e bëri një video e dhimbshme nga Siria, ku një foshnje e sapolindur u gjet nën rrënoja. Ajo ishte ende e lidhur me kordonin e kërthizës së të ëmës, që kishte ndërruar jetë.
Babai i foshnjës gjithashtu kishte vdekur nën rrënojat e shtëpisë, së bashku me katër fëmijët e tjerë.
Forcat e kërkim-shpëtimit e gjetën bebushen më shumë se dhjetë orë pas tragjedisë dhe nxituan ta mbështjellin me batanije e ta shpëtojnë.
Ajo u dërgua në spital, ku iu dha ndihma e shpejtë ndërsa mjekët treguan se bebushja kishte të çara e mavijosje në trup. Madje, nga i ftohti kishte ballin dhe gishtërinjtë të nxirë.
“Ajo gjithashtu mbërriti me hipotermi për shkak të të ftohtit të ashpër. Ne duhej ta ngrohnim dhe t’i jepnim kalcium,” tha pediatri Hani Maaroouf.
