Ministria e Shëndetësisë së Maqedonisë së Veriut, ka bërë me dije se me ndihmën e Bashkimit Evropian do të sigurojë ilaçin e “Remdesivirit”, i cili shërben për të trajtuar pacientët me Covid-19.
Nga deklarata e Ministrisë së Shëndetësisë së Maqedonisë së Veriut, mësohet se furnizimi me “Remdesivir”, do të jetë një marrëveshje e përbashkët midis 36 vendeve, përfshirë edhe Shqipërinë.
Mediat maqedonase kanë bërë me dije se Ministria e Shëndetësisë ka theksuar se Komisioni Evropian ka nënshkruar marrëveshje me kompaninë farmaceutike “Gilead”, për blerjen e 500.000 dozave nga “Veklury”, emri i brendit të ilaçit “Remdesivir”, me mundësinë edhe për rritjen e sasive të furnizimit me këtë ilaç.
“Marrëveshje e përbashkët për blerje është nënshkruar nga 36 vende, duke përfshirë vendet e BE-së, Norvegjinë dhe Islandën, Mbretërinë e Bashkuar dhe gjashtë vendet kandidate për në BE, që përveç Maqedonisë së Veriut janë edhe Shqipëria, Kosova, Serbia, Mali i Zi, dhe Bosnja e Hercegovina”, thotë deklarata e Ministrisë së Shëndetësisë.
Deri më tani, Maqedonia e Veriut ka zbatuar për herë të gjashtë me sukses, procedurën e blerjes së ilaçeve”Remdesivir”.
Bazuar nëpërmjet Studimit klinik të Organizatës Botërore të Shëndetësisë (OBSH), Maqedonia e Veriut e posedon ilaçin “Remdesivir”, por ndërkohë qeveria maqedonase kërkon që të sigurojë sasi shtesë nga i njëjti ilaç.
Ndërkohë kompania që prodhoi “Remdesivirin”, Gilead Sciences, ka vendosur një çmim standart prej 390 dollarësh për kurë për qeverinë amerikane, e cila do të përfshijë spitalet e Departamentit të Mbrojtjes, dhe qeveritë e tjera të vendeve të zhvilluara në rast se ato bëjnë marrëveshje për furnizimin me këtë ilaç.
Ky çmim i kripur ka hasur në shumë kundërshtime nga shoqëria civile, ekspertët shëndetësorë dhe mediat në SHBA.
Sipas një përllogaritjeje, një pacienti të infektuar me Covid-19, i duhet një trajtim me “Remdesivir” për pesë ditë dhe kura kërkon 6 shishe “Remdesivir”, të cilat do të shkonin 2,340 dollarë për pacient. Një çmim që shumica e pacientëve nuk e përballojnë dot.
Shumë ekspertë shëndetësorë në SHBA, kanë kërkuar me ngulm që ilaçi i “Remdesivirit” duhet të jetë publik sepse për prodhimin e ilaçit janë përdorën 70 milion dollarë nga fondet publike./Iconstyle.al.
