Futbollisti shqiptar Rei Manaj ka ndarë së fundmi një moment të veçantë nga fillimet e tij në karrierë gjatë një interviste në “Opinion” me Blendi Fevziun. Ai riktheu vëmendjen te kohët kur sapo kishte nënshkruar kontratën e parë profesionale me Cremonese dhe rrëfeu se gjëja e parë që bëri me rrogën e parë prej 6 mijë eurosh – një shumë e konsiderueshme për një 17-vjeçar – ishte të largonte të ëmën nga puna.
“Rroga e parë që mora ishte 6 mijë euro në muaj. Kisha dy prindër që punonin në Itali dhe gjëja e parë që bëra ishte të hiqja mamin nga puna dhe e hoqa. Nuk e kisha menduar kaq gjatë, por absolutisht ai ishte objektivi im kryesor”, tregoi Manaj.
Deklarata e tij tregon përkushtimin dhe përgjegjësinë që ai ndjeu ndaj familjes edhe në moshë shumë të re. Futbollisti u shpreh se ky veprim ishte një mënyrë për të falënderuar prindërit për sakrificat e tyre dhe për të siguruar një jetë më të rehatshme për ta.
Ky rrëfim është një pasqyrë e rrugëtimit të tij nga një adoleshent që aspironte të bënte karrierë në futbollin profesionist deri te realizimi i objektivave personale dhe familjare. Gjesti i Manajt tregon se, përtej talentit dhe punës së madhe në fushë, ai ka pasur gjithmonë një qëllim human dhe të ndjeshëm për ata që e rritën dhe mbështetën.
