Kantautori i njohur shqiptar Elton Deda, i ka bërë një thirrje publike kryeministrit Edi Rama, pas aktit të ri normativ të qeverisë për mbylljen e klubeve të natës, diskove dhe bareve Lounge.
Në një postim në Facebook, ku nuk përmend emra konkretë, ai i drejtohet kreut të qeverisë për t’i thënë të shfuqizojë aktin dhe të bëjë një të ri me shtrëngimin e masave kundër koronavirusit.
Ky mesazh “miqësor” vjen në një kohë që artistët shqiptarë kanë 5 muaj që nuk performojnë dhe madje nuk kanë përfituar as nga paga e luftës.
“Reflekto or mik sa nuk është vone. Mos jua mbyll shqiptareve te dërrmuar atë dritaren e zbehte qe u jep pak kenaqesi. Ka plot forma qe mos ti rrënosh muzikantet e bashke me ta gjithë zinxhirin e biznesit. Shfuqizo atë aktin e çuditshëm dhe bej një te ri ku shtrëngon masat. Ti do thuash “jemi keq si komb e s’marrim vesh”…por ta garantoj qe kështu nuk do marrim vesh jo për inat, por sepse po shkojmë drejt një grope te madhe. Sa me shpejt madje. Miqësisht, një pjese e armatës te denigruar prej 5 muajsh”.
Ndërkohë, shumë artistë dhe pronarë të klubeve të natës, kanë dy ditë që protestojnë para Kryeministrisë pas vendimit që hyri në fuqi nga dje.
Sot, Policia e Tiranës njoftoi procedimin e 12 personave pas protestës së djeshme të artistëve para Kryeministrisë. Këta persona akuzohen për “Organizim dhe pjesëmarrje në tubime të paligjshme” dhe “Pengimi i qarkullimit të mjeteve të transportit”.
