Pa kaluar as një muaj nga rasti i rëndë që tronditi mbarë opinionin publik, ku një e moshuar u dhunua barbarisht nga infermieret e qendrës “Orenda” në Pejë, një tjetër rast dhune ndaj një të moshuari është regjistruar së fundmi. Kësaj here në Tiranë.
Në disa pamje të publikuara nga “JOQ Albania”, shihet një i moshuar teksa dhunohet nga dy të rinj, në mes të ditës, në mes të rrugës.
Raportohet se i moshuari po mbronte nipin e tij të vogël, kur u dhunua dhe u ofendua nga dy të rinj. Ndërkohë dëgjohen edhe të qarat e nipit të tij.
I moshuari i përplas nga dera e urbanit në të cilin po udhëtonte, pasi shoferi e mbylli shpejt duke mos i lënë kohë të zbresë. Teks ai moshuari tregoi nervozizëm ndaj shoferit të urbanit, u përball me dy të rinj, të cilët mendohet të jenë përgjegjës të linjës dhe kontrollor. Sipas “JOQ”, ngjarja ka ndodhur në zonën e Astirit.
Ajo që është po aq tragjike sa edhe vetë ngjarja, është pikërisht mungesa e reagimeve dhe heshtja e të gjithëve. Policia e shtetit nuk ka bërë asnjë reagim zyrtar në lidhje me çështjen, pavarësisht se u bë publike. Nga ana tjetër shihet një heshtje edhe nga ana jo vetëm e personazheve publikë, por edhe e institucioneve të tjera kompetente.
Nëse bëjmë një krahasim me ngjarjen e ndodhur në Pejë, e cila u bë gjithashtu publike, duket sikur dhuna ndaj të moshuarit në Tiranë nuk po bën mjaftueshëm “përshtypje” ose “bujë”, sa të reagohet publikisht në lidhje me të.
Videoja e të moshuarës në Pejë u shpërnda kudo në rrjet, me qindra-mijëra persona reaguan të revoltuar (virtualisht), me komente dhe statuse, por është e habitshme që për një ngjarje shumë e ngjashme me të, askush nuk reagon. Megjithatë, vlen të përmendet se në protestën që u zhvillua në atë kohë për rastin e Pejës, u panë rreth 10 persona.
Mirëpo a ka diçka që e përcakton shkallën e rëndësisë së një ngjarjeje të tillë? A nuk është njësoj dhuna e ushtruar që nuk ka asnjë reagim? Pse nuk po reagojmë njësoj për rastet e dhunës?
