Shqipëria ka konfirmuar zyrtarisht rastin e parë me linë e majmunit (mpox). Bëhet fjalë për një 30-vjeçar, i cili rezulton i infektuar me këtë virus infektiv që deri më sot nuk ishte identifikuar në vendin tonë.
Sipas burimeve mjekësore, i riu kishte udhëtuar jashtë vendit, në zona ku virusi qarkullon më gjerësisht – një fakt që konsiderohet si burimi më i mundshëm i infektimit. Deri në këto momente, nuk raportohet për raste të tjera, ndërsa Instituti i Shëndetit Publik vijon monitorimin.
Çfarë është saktësisht monkeypox?
Mpox (ose lija e majmunit) është një sëmundje virale që shfaqet me temperaturë, lodhje, dhimbje trupi dhe skuqje të lëkurës, të cilat më pas kthehen në puçrra me kore. Këto shenja prekin zakonisht fytyrën, duart dhe zonat gjenitale.
Si transmetohet?
Përmes kontaktit të drejtpërdrejtë me lëkurën e një personi të infektuar, përfshirë edhe marrëdhëniet intime, si dhe përmes tekstileve të ndotura – çarçafë, rroba apo peshqirë.
Nga erdhi virusi?
Origjina e tij lidhet me kafshë të egra në Afrikë, por në vitin 2022 sëmundja u përhap me shpejtësi edhe në Evropë, SHBA dhe Mbretërinë e Bashkuar. Aktualisht, Spanja është vendi më i prekur në kontinent, me mbi 8,000 raste.
A është e rrezikshme?
Edhe pse e kurueshme, mpox kërkon izolim për të parandaluar përhapjen. Format më të rënda prekin personat me imunitet të dobësuar dhe fëmijët.
