Protesta për Klodian Rashën është zhvendosur tashmë tek Kryeministria ku të gjithë janë mbledhur, duke kërkuar që të futen brenda godinës.
Mësohet se përveç forcave të rendit, pranë ndodhen edhe tre furgona shtesë me efektivë të FNSH-së, në mbështetje për efektivët e tjerë. Nuk dihet nëse efektivët do të qëndrojnë në gatishëmëri, apo do të ndërhyjnë për të shpërndarë protestën.
Protestuesit kanë ngjitur shkallët qetësisht për tek godina e Kryeministrisë, teksa efektivët i kanë lejuar që të ngjiten dhe nuk i kanë kundërshtuar. Ndërsa vetë, kanë krijuar kordon tek dera kryesore dhe qëndrojnë ngjitur me njëri-tjetrin.
Por teksa kërkonin drejtësi për Rashën, disa të rinj janë përplasur me njëri-tjetrin. Nuk kanë munguar të shtyrat, sharjet dhe grushtat.
I plagosur ka mbetur edhe gazetari i JOQ Albania, Andi Llubashi, i cili përpara kamerave tha se nuk e kuptoi as vetë se nga i erdhi goditja, vetëm kur e ka parë veten në tokë.
“Nuk e di nga më erdhi, më qëlluan, isha në turëm. S’e kuptova as vetë se si, vetëm kur pashë veten në tokë,”- thotë ai ndër të tjera.
Nga përplasjet tek Ministria e Brendshme kanë ngelur i lënduar edhe Stresi.
Ndërkohë, zemërimin për vrasjen e Klodian Rashës të rinjtë duket se po e nxjerrin me pemën e Krishtlindjes e vendosur në hyrje të godinës qeveritare të cilën janë munduar ta rrëzojnë.
