Raporti i testit PISA/ Shqipëria nën mesataren evropiane, numrin më të lartë të mësuesve të papërgatitur!

Organizata për Bashkëpunim dhe Zhvillim Ekonomik (OECD), ka publikuar raportin e ri përmbledhës dhe bazuar edhe në analizën e rezultateve të testit të PISA-s, rezulton se më shumë se 8% e mësuesve në Shqipëri dhe 10% e mësuesve në Kosovë nuk përgatiten për orët mësimore në klasë.

Kujtojmë se testi i PISA-s është raporti ndërkombëtar vjetor i  “Programit për Vlerësimin Ndërkombëtar të Nxënësve” (PISA), i cili mat dhe vlerëson aftësitë e 15 vjeçarëve në shkencë, matematikë, lexim dhe logjikë.

Në raportin përmbledhës të (OECD), konstatohet që Shqipëria dhe Kosova kishin përqindjet më të larta të mësuesve që nuk përgatiten për mësimin, në raport me vendet e tjera të Ballkanit dhe nën mesataren e Europës Juglindor.

Sipas raportit të vlerësimit, Serbia ka përqindjen më të ulët (2%) të mësuesve që vijojnë mësimin në klasë pa përgatitjen e duhur.

Po ashtu në raport me vendet e tjera të rajonit, mësuesit malazezë, shqiptarë dhe serb, janë më të prirur për t’u përshtatur me metodologjitë e reja të mësimdhënies dhe me ndryshimin e kurrikulave.

Ndërkohë mësuesit maqedonas dhe boshnjakë, i kanë më të vështirë të ndryshojnë metodikën në mësimdhënien e tyre.

Në raportin e vlerësimit PISA 2018, në anketimin studimor u pyetën edhe drejtuesit e shkollave për shkallën në të cilën sjelljet dhe praktikat e caktuara të mësuesve, si rezistenca e mësuesve për të ndryshuar, parapërgatitja, mund të krijojnë një klimë të pakëndshme shkollore dhe të pengojnë procesin e të mësuarit të nxënësve e studentëve.

Mësuesit, po ashtu, jo vetëm që duhet të jenë të aftë në metodat pedagogjike, por duhet të kenë këndvështrimin e duhur dhe mentalitetin për të punuar ngushtë me nxënësit, qofshin edhe në mjedise të vështira mësimdhënieje.

Krahasuar me standardet ndërkombëtare, mësuesit në shkollat e Ballkanit Perëndimor tregojnë nivele më të larta të mungesave dhe mosgatishmërisë për bashkëpunim.

Analiza e Organizatës për Bashkëpunim dhe Zhvillim Ekonomik (OECD), ka treguar ndër të tjera edhe gjetjet e testit PISA për mësuesit në Ballkanin Perëndimor, të cilët kanë ngritur shqetësimin se përse mësuesit mund të mos demonstrojnë sjellje profesionale në raport me nxënësit dhe studentët.

Kjo sjellje mund të reflektojë pakënaqësine e tyre apo nevojën për të parë më nga afër kushtet e punës dhe pagës së mësuesve, si dhe përshtatjen e politikave që lidhen me llogaridhënien dhe sjelljen etike të mësuesve.

Ndërkohë të gjitha sistemet arsimore të Ballkanit Perëndimor kanë krijuar standarde të mësuesve për të gjithë sistemin arsimor, për të ndihmuar në zhvillimin e këtij profesioni.

Studimi në lidhje me mësimdhënien në Ballkan, vëren se në këtë rajon nuk nxiten stimuj për mësuesit që kanë një karrierë bazuar në standarte.

Për të marrë një shembull konkret në rajon, sistemi arsimor në Serbi përshembull, ka një strukturë karriere të bazuar në meritat e mësuesve.

Mirëpo kjo strukturë nuk përfshin standartet e mësuesve, të cilat nuk përdoren qartë si referencë në vendimet për  ngritje në detyrë të mësuesve meritor, apo të shpërblimit me rroga më të larta për to./Iconstyle.al/