Kryeministri i Shqipërisë, Edi Rama, ka reaguar ndaj kërkesës së TikTok për “sqarime urgjente” në lidhje me vendimin për ndalimin e platformës për një vit. Kompania kineze, sipas Associated Press, kërkoi sqarime nga qeveria shqiptare pas këtij vendimi.
Në reagimin e tij në platformën X, Rama theksoi se TikTok nuk ka arsye të kërkojë sqarime nga Shqipëria, duke shtuar se vendimet në Shqipëri i merr populli shqiptar dhe jo algoritmi i TikTok-ut. Kjo deklaratë vjen pas shqetësimeve të ngritura lidhur me ndikimin e mundshëm të platformës dhe shqyrtimin e ndikimeve të saj në sigurinë kombëtare dhe shëndetin e përdoruesve, veçanërisht të rinjtë.
“Ndalimi i TikTok-ut për (të paktën) një vit në Shqipëri, nuk është një reagim i nxituar ndaj thjesht një ngjarjeje, por një vendim i këshilluar gjerësisht me komunitetet e prindërve në shkollat e gjithë Shqipërisë. Tik Tok-u nuk ka çfarë sqarimesh kërkon nga Shqipëria, sepse në Shqipëri vendosin shqiptarët jo pronarët e algoritmit të TikTokut. Ndërsa Shqipëria është shumë e vogël për t’i kërkuar TikTok-ut të mbrojë fëmijët dhe rininë nga humnerat e frikshme të algoritmit të tij, por uron që TikTok-u ta bëjë këtë për të mirën e të gjithë njerëzimit, përfshirë edhe Shqipërinë.
Të thuash se vrasja e nxënësit adoleshent s’ka lidhje me TikTok-un, sepse konflikti nuk qenka gjeneruar nga Tik Toku do të thotë të mos kesh kuptuar as seriozitetin e kërcënimit që ajo plaftormë ka sjellë për fëmijët dhe rininë e kësaj kohe, as fillin e arsyetimit të vendimit tonë për të marrë përgjegjësinë e reagimit ndaj atij kërcënimi”.
Rama nënvizoi se mbi 90% e prindërve në Shqipëri mbështesin ndalimin e TikTok-ut dhe se vendimi është në interes të mbrojtjes së shëndetit të fëmijëve.
“Fortlumturisht Shqipëria është një vend demokratik, ku kur mbi 90% e prindërve kërkojnë ndalimin e TikTok-ut dhe kur shumica dërmuese beson se shëndeti i fëmijëve tanë nuk mund t’i shërbejë platformës, po platforma duhet t’i shërbejë shëndetit të fëmijëve tanë, atëherë vendimi ynë nuk ka se si të jetë më i qartë: Ose vetë Tik Tok-u duhet t’i mbrojë fëmijët e Shqipërisë ose Shqipëria do t’i mbrojë fëmijët e vet nga TikTok-u” e mbyll reagimin e tij kryeministri i Shqipërisë Edi Rama.
