Si rrallëherë, pika e kalimit kufitar në Kapshticë është bosh!
Në pamjet që sjell Report tv, shohim se nuk ka asnjë automjet në radhë dhe arsyeja për këtë është se nga sot kanë hyrë në fuqi rregullat e reja, sipas të cilave, për të hyrë në Greqi, kërkohet testi i COVID-19 si dhe 7 ditë karantinë.
Deri më 16 gusht, testi realizohej në kufi falas, gjë që solli edhe radhët e gjata në Kapshticë dhe në Kakavijë, por tashmë për të hyrë në Greqi kërkohet testi negativ i Covid si dhe formulari PLF.
Qytetarët janë të detyruar që të kryejnë tamponin në privat nëse duan të udhëtojnë drejt Greqisë. Në një kohë që Italia ka bërë me dije se do t’ju realizojë tamponin falas udhëtareve shqiptarë, shteti shqiptar i udhëzon qytetarët e vet që të shkojnë të bëjnë tamponin në privat.
Në njoftimin e policisë kufitare thuhet se duhet të kesh me vete “Çertifikatën e kryerjes së testit COVID-19, jo më vonë së 72 orë nga dita e udhëtimit dhe rezultati të jetë NEGATIV”.
Sa i përket testimit, thuhet se ai duhet të jetë bërë “nga autoriteti shtetëror (Instituti i Shëndetësisë) ose nga çdo spital apo klinikë e certifikuar dhe e njohur nga shteti”.
Por nëse bëhet fjalë vetëm për dokument udhëtimi, ISHP është shprehur prej kohësh se nuk ka kapacitete për të realizuar tamponin në masë të gjërë, pasi po merret me testimin e të dyshuarve që mund të kenë virus, atyre që kanë simptoma.
Kështu qytetarëve që duan të udhëtojnë jashtë nuk u mbetet gjë tjetër veçse të paguajnë 95 euro, në privat në një kohë që ligji parashikon se duhet të jetë FALAS.
/Iconstyle.al
