Tiranë është një nga qytetet e vendit që ka çmimin më të lartë të ujit të pijshëm për frymë dhe familje, kjo duke i shtuar faturës edhe disa taksa të Bashkisë, si dhe taksën e banesës për metër katror.
Por edhe vetë çmimi i ujit të pijshëm për metër kub që paguan çdo konsumator familjar në Tiranë është nga më të shtrenjtët, pasi uji që vjen në rrubineta nga Bovilla nuk është ujë i pijshëm dhe qytetarët detyrohen që ta blejnë në supermarkete ujin e pijshëm.
Por kjo nuk ka asnjë rëndësi për Bashkinë e Tiranës dhe Ndërmarrjen e Ujësjellës Kanalizimeve në vartësi të bashkisë, të cilat nuk kanë deklaruar në asnjë moment se do të rishikojnë çmimin për qytetarët, madje kanë deklaruar se çmimi i ujit edhe mund të rritet.
Sipas një shkrimi të botuar disa kohë më parë, ndërmarrje e UKT-së në vartësi të Bashkisë së Tiranës, ishte ndër të parat që kishte aplikuar pranë Entit Rregullator të Ujit (ERU) jo më për një ulje të çmimit, por për një rritje në vitin e ardhshëm.
Dhe duket se shkak për këtë janë tenderat e shumtë që kjo ndërmarrje po zhvillon, që në disa raste ngrenë edhe hije dyshimi.
Tenderi i ri për Bovillën
Ujësjellësi i Tiranës ka parashikuar dhe ka nisur nga procedura tashmë për një tender që do të kryhet për të shtuar kapacitetet e impiantit të Bovillës.
Tenderi i radhës synon të financojë projektin e depos së “Daias” dhe impiantit të Bovillës për të cilat në dispozicion kanë rreth 20 milionë euro.
Këtë të herë UKT-ja hapi dy procedura prokurimi respektivisht me vlerë 1.7 miliardë lekë për kontratën me objekt “Shtesa e Impiantit të përpunimit të ujit të pijshëm Bovillë 1800l/s faza e 2 me 1200l/s” dhe një tjetër me vlerë 789 milionë lekë me objekt “Ndërtim Tubacion Transmetimi Basen Presioni- Tunel- Partitar- Depo Daias”.
Në verën e këtij viti UKT inauguroi fazën e parë të shtesës së Bovillës, që furnizon me ujë kryeqytetin. Zgjerimi i impiantit të Bovillës me 40% më shumë të kapacitetit të tij trajtues, tashmë përpunon 2500 l/sec ujë të pijshëm nga 1800 l/sec.
Vepra e marrjes së ujit është rreth 280 metra mbi nivelin e detit dhe transmetohet përmes tubacioneve me dimension 1200 – 900 mm. Për ndërhyrjet është marrë një financim nga Banka Europiane për Rindërtim dhe Zhvillim.
Uji 24 orë një premtim i pa mbajtur
Kur edhe viti 2020 po del dhe vitin që vjen kemi një vit elektoral pasi në prill janë zgjedhjet parlamentare, si qeveria “Rama” ashtu dhe pushteti lokal në Tiranë, po bëjnë fushatë me premtimin për ujë 24 orë.
Edhe pse ka plot 30 vite demokraci që shqiptarëve u premtohet ujë 24 orë, asgjë nuk është bërë konkrete dhe realitet.
Argumenti për ndërhyrjet në rrjet gjatë këtyre viteve ka qenë sigurimi i furnizimit me ujë në 24 orë për të gjithë banorët e kryeqytetit, por ky objektiv mbetet ende larg dhe ka nevoje për investime shtesë, që do të thotë tarifa ende të kripura në faturat e ujit.
Po nën këtë argument dy vite më parë u propozua dhe u bë edhe rritje e dukshme e tarifave për furnizimin me ujë. Konkretisht në janar të vitit 2018 çmimi i ujit të pijshëm u rrit 65 lekë/m3 nga 45 lekë për m3, që ishte më parë, ose 44% më i shtrenjtë.
Kjo bëri që në dy vitet e fundit UKT-ja, të ketë një bilanc pozitiv ku për vitin 2018 u dyfishua fitimi në 10 milionë euro, kur në të njëjtin vit investimet ishin 54% më pak se plani.
Në vitin 2019 fitimet e UKT ishin 8.6 milionë euro. Ndryshe nga 2018-a, kur arkëtimet u rritën me 38% me bazë vjetore, si rrjedhojë e shtrenjtimit të tarifave më 44%, në 2019-n të ardhurat e raportuara shënuan një rënie të lehtë me 1.9%.
Në 2019-n Ujësjellësi hartoi dhe projektin “Furnizimi me ujë 24 h” për sot dhe për një perspektive 25-vjeçare të qytetit të Tiranës nëpërmjet Unazës së presionit mbështetur në studimin e masterplanit të zhvillimit teknik dhe strategjik nga “Budapest Water Works”.
Ndërkohë që vetëm pak kohë më parë u hap një tjetër procedurë për rishikimin e planit 5 vjeçar të biznesit të Ujësjellësit, ku ndër të tjera do të analizohen edhe tarifat duke parë mundësinë e rishikimit, edhe pse deri tani flitet vetëm për rritje dhe aspak për një ulje të tyre.
/Iconstyle.al/
