Disa ditë më parë u publikua nga shoqata “Albania Food” studimi për produktet blegtorale dhe ato të mishit që shiten në tregun shqiptar. Rezultatet ishin skandaloze. Në qumështin që shqiptarët konsumojnë çdo ditë u gjetën mbetje të alfatoksinës, një toksinë e rrezikshme që dëmton mëlçinë dhe bëhet shkaktare për zhvillimin kancerit.
I menjëhershëm ka qenë reagimi i ish-Ministrit të Bujqësisë, Edmond Panariti, i cili ka kërkuar hetim të menjëhershëm për këtë skandal. Përmes një statusi në “Facebook”, ai e ka cilësuar këtë një megaskandal ose një supermashtrim dhe kërkon tërheqjen nga tregu të këtyre produkteve. Mbi të gjitha ka kërkuar të zbardhen emrat e produkteve dhe firmave që i hedhin në treg ato.
“Ose një megaskandal, ose një supermashtrim!! Mbetet për tu parë.?! .. Para disa ditësh në një studim të AFI, gjysma e mostrave të qumështit vendas të analizuara dolën me aflatoksinë.
Aflatoksina është substance kancerogjene e fuqisë shumë të lartë, e pa zbërthyeshme dhe rezistente ndaj përpunimit termik. Prania e saj në qumësht dhe nënprodukte është rrezik shumë i madh për shëndetin e konsumatorit.
MB dhe AKU duhet të bëjnë urgjent publike fermat apo subjektet prodhuese të ushqimeve të ndotura , të bllokojnë prodhimin dhe të tërheqin urgjent nga tregu produktet e përlyera. Sa më parë dhe menjëherë!!! Ndërkohe AFI të bëjë publike rezultatet e analizave, metodat e analizës dhe laboratorët e referencës që i kanë kryer ato.
Nëse kjo nuk ndodh atëherë prokuroria të nis hetimin e menjëhershëm dhe të përcaktojë përgjegjësitë ose eventualisht mashtrimin siç ka ndodhur më parë në dëm të prodhuesve vendas, për të favorizuar importet.”, ka shkruar Panariti në “Facebook”.
