Themeluesja e fondacionit “Don Syndrome Albania”, Emanuela Pepkola Zaimi ka dënuar ashpër gjuhën e përdorur nga deputeti i PS-së Alket Hyseni.
Ky i fundit e quajti ish-kryeministrin Sali Berisha “Plak Autik”, pasi publikoi një foto të Hysenit i cili ishte pritur në Ksamil nga Valbona Oruci, e cila është motra e Dino Muhaj i akuzuar për vrasjen e Alket Muhaj në fshatin Rabije të Tepelenës në fillim të muajit shtator.
Zaimi i kërkon komisionares për mbrojtjen nga Diskriminimi, Vasilika Hysit, që të reagojë ndaj fjalorit të Hysenit, ndërsa u bën thirrje të gjithë politikanëve të mos përdorin gjendjet e femijëve autikë për fyerje.
Ajo madje ka kërkuar dorëheqjen e deputetit Alket Hyseni dhe shprehet se nuk do të ndalet deri sa kjo të ndodhë:
Psikologia e njohur Denada Toçe, gjithashtu i ka kërkuar deputetit të kërkojë falje publike përdorimin e fjalës “autik” si një epitet fyes.
Deputeti Hyseni nuk ka reaguar publikisht deri më tani, për të kërkuar ndjesë publike. Mirëpo, pak minuta më parë ai ka ndryshuar statusin, duke zëvendësuar tre herë fjalën autik me fjalët; shfazim, sindromë, e plak i çartur.
Postimi i plotë i Emanuela Pepkola Zaimit:
“#AlketHyseniJepniDoreheqjen
Nga ky moment e deri sa të behet realitet unë do të bëj të pamundurën që ky deputet të japë dorëheqjen e të mos jetë më përfaqësues i popullit shqiptar dhe i paguar me taksat tona.
Të mos guxojë me politikan të përdorë gjendjet e fëmijëve tanë për fyerje.
Komisioneri për Mbrojtjen nga Diskriminimi REAGO!
Vasilika Hysi të lutem reago në cilësinë e zv/kryetares së Kuvendit.
European Union in Albania please react!
Sot mua e Zela Koka na doli rryli në seancë dëgjimore të komisionit për arsimin, për një buxhet që siguron mundësi të barabarta për arsim cilësor të fëmijëve tanë.
Pas një ditë të tillë, në vend që të jesh e qetë e të fokusohesh ke fëmijët e tu, të duhet të merresh me politikanë çnjerëzore që hanë bukë nga taksat e tua dhe qe te shumëzojnë te gjithë punën me zero”, shkruan Emanuela Pepkola Zaimi.
