Kriza financiare e krijuar si pasojë e pandemisë së koronavirusit ka prekur më së shumti mediat dhe gazetarët në vend, e megjithatë qeveria vijon të mos bëjë asnjë gjë për këtë pjesë, duke i lënë ata në mëshirë të fatit.
Situata e mediave në vend ka tërhehur vëmendjen edhe të presidentit Ilir Meta, i cili nga studioja e emisionit “Tempora” me Sonila Meçon në RTV Ora, u shpreh se gazetarët kanë bërë një punë të shkëlqyer në këtë kohë pandemie.
Meta theksoi se situata gazetarëve është kritike dhe duhet të ishte menduar një mbështetje apo një lehtësim për situatën e tyre.
“Unë kam folur në mënyrë të qëndrueshme për këtë çështje. Gazetarët kanë bërë një punë të shkëlqyer pasi kanë qenë të ekspozuar pranë spitaleve dhe duke ndërgjegjësuar opinioni publik me raportimet e tyre. Puna e tyre është e pazëvendësueshme. Situata e tyre është kritike dhe duhet të ishte menduar për një mbështetje dhe një lehtësim për situatën e tyre, brenda mundësive të përgjithshme”.
Më tej, kreu i Shteti i kërkoi mazhorancës të reflektojë, pasi të vesh në pozitë të vështirë median dhe të mos i garantosh asaj liri është një situatë alarmante.
“Duke pasur në konsideratë situatën e vendit tonë, pa Gjykatë Kushtetuese dhe pa një sistemi gjyqësor eficent, pa një parlament në përputhje me kushtetutën dhe ku praktikisht ka humbur llogaridhënia, përveç dhe pushtetit vendor , tani dhe ky pushteti tjetër media të vendoset në një pozitë gjithnjë e më të vështirë apo të mos garantosh lirinë e saj është alarmuese dhe ka një përkeqësim të qëndrueshëm. Prandaj kërkohet një reflektim i menjëhershëm nga qeveria, parlamenti”.
Megjithatë qeveria nuk po bën asgjë për këtë situatë, duke i përjashtuar mediat nga ndihma ekonomike në kohë pandemie.
Në një komunikim me “Iconstyle.al”, kryetari i Unionit të Gazetarëve, Aleksandër Cipa, u shpreh se nuk ka ende asnjë negociatë lidhur me lehtësirat për mediat dhe gazetarët.
Me rastin e Ditës Botërore të Lirisë së Shtypit, përfaqësuesi i OSBE-së për Lirinë e Medias, Harlem Desir, bëri thirrje për respektim, liri dhe mbështetje financiare të mediave që po përballen me vështirësi ekonomike.
Një thirrje të përsëritur ka pasur nga mediat e veçanërisht nga iconstyle.al (lexo këtu), Shoqata e Gazetarëve Europianë, apo Unioni i Gazetarëve, për nevojën e përfshirjes së tyre planin financiar për përballimin e krizës së shkaktuar nga koronavirusi në Shqipëri.
Mediat në vend janë aktualisht në krizë, disa media audio-vizive dhe online kanë pezulluar përkohësisht pagat e gazetarëve, dhe të tjera media kanë reduktuar pagat e punonjësve në pamundësi për të përballluar situatën.
/Iconstyle.al
