Qeni cilësohet si miku me katër këmbë, por për një familje në Elbasan ai që duhet të ishte kujdestari i shtëpisë është kthyer në një makth.
Familja e Ismail Nasufit qëndronte e mbyllur prej mesjavës së kaluar, pasi qeni i tyre ishte kthyer në një kërcënim serioz për jetën e familjarëve dhe të fqinjëve.
Në fillim qeni i familjes kishte kafshuar të zotin e shtëpisë në dorë, ndërsa më pas nga frika të gjithë pjesëtarët ishin ngujuar brenda shtëpisë.
Ishin banorët e zonës ata që sinjalizuan policinë për rrezikun e madh që u kanosej nga qeni i tërbuar. Derisa të shtunën në mesditë u bë asgjësimi dhe groposja e qenit të tërbuar. Pas asgjësimit u bënë analizat e gjakut dhe dezinfektimi i zonës së infektuar prej qenit.
