Policia e Dibrës ka dyshime të forta se autori i krimit Qemal Sela është i shëndoshë mendërisht dhe se problemet në lidhje me shëndetin mendor janë inskenuar prej tij, pasi i mori jetën nënës dhe babait pak ditë më parë. Oficerët e Policisë që kryen shoqërimin e Qemal Selës nga Dibra drejt Tiranës, u shprehën se gjatë udhëtimit, ai i është përgjigjur normalisht pyetjeve që i drejtoheshin, por vetëm kur flitej për vrasjen e dy prindërve tentonte të anashkalonte bisedën. Gazeta “Panorama” shkruan se në të njëjtin konkluzion ka dalë edhe psikiatri i Selës, i cili është shprehur: ‘Ky qenka më në rregull sesa ne’.
Ndërkohë që e vërteta e armës së krimit të përdorur në ditën e ngjarjes është ndryshe. Më herët Policia bëri të ditur se familja Sela e mbante armën për të ruajtur biznesin. Sakaq, ka rezultuar se autori Qemal Sela, para se të largohej në Angli shtatë vite më parë, e kishte fshehur atë në murin e shtëpisë. Madje, ai e kishte suvatuar armën në mur që të mos binte në sy. Kjo ka ngritur dyshimet, se ai e ka kryer krimin me paramendim, sepse prindërit i kishin shpenzuar kursimet e tij.
Më herët, gjatë marrjes në pyetje në Gjykatë, autori i krimit, Qemal Sela është shprehur se: “Vrava dy maska, m’u dukën si hije. Nuk kam vrarë prindërit e mi. Nënën time e njoh nga dhëmbët. Nuk është ajo që vrava. Ai tjetri e ka emrin Flamur, por nuk është babai im.”
